السلام عليكم و رحمة الله و بركاته
كنت مرشحة لحضور دورة تدريبية مع مجموعة من الدكاترة … طبعاً وقت الدورة كان ممتاز بالنسبة لي … يعني ايلس و اتعلم و ارّيح راسي من الشغل شوي، المهم مكان الدورة … كليات الطلاب … و اقووووول هذا الناقص ؟؟؟
المهم سرت المختبر اللي مفروض نتدرب فيه و نحضر فيه للدورة … دشيت المختبر، ما عرفت وين اخش ويهي من الحيا … فضيحة… انا و اعوووووذ بالله من كلمة انا الوحيدة المواطنة … و اصغر متدربة و الباجيين دكاترة وأكثرهم رياييل، الحمد لله … حصلت وحدة طلبت مني ايلس حذالها ( عندها ) و بصراحة كنت خايفة انجبر ايلس عند واحد من الدكاترة ييلس طول الوقت يرمس او يلعب و ما اروم اركز و اتعلم.
المهم بدأت الدورة و بدأنا نتدرب … مجموعة من الدكاترة مب مهتمين بالدورة و لا يبووون يتعلمون، استغرب كيف صاروا دكاترة … و من هنا و هناك موبايل واحد منهم يرن و واحد يضحك و الثاني يرمس و الثالث يبي يفهم بس انجليزيته ما تساعده … الله يعينه … و الشيء اللي ضايجني انهم ما كانوا يحترمون الانسان اللي كان يالس يدربنا على البرنامج اليديد … كانوا ي**رونه بإسمه الاول بس و يعاملونه كأنه واحد يشتغل عندهم و ما يحاولون يفهمون، يعني على الأقل يظهرون نوع من الاحترام و المشكلة ان صار و صوتهم صار أعلى من صوت المسؤول عن التدريب … ما شي الا من رحم ربك.
كانت الدورة لمدة يومين، خلصنا التدريب و الحمد لله تعلمنا شي يديد … سألت واااايد أسئله كرهّت المسؤول عن التدريب فحياته من كثر ما سألته، تعرفت على ناس يداد … و عرفت أشياء يديدة … بس السؤال اللي ما حصلت له جواب:
لييييييش الدكاترة عاملوا المسؤول عن التدريب بهذي الطريقة، ليييييش بعضهم ما حاولوا يتعلمون؟ ( تراهم مسؤولين عن تدريب غيرهم، كل واحد يدّرب الدكاترة اللي عنده في الكلية اللي يشتغل فيها، و الشيء هذا خلاني اتحمل مسؤولية التدريب، و نقل المعلومات ) و كيف مع اللامبالاة صاروا دكاترة و لا الشي هذا ظهر بعدين فيهم؟
همسة في أذن اللي كانوا في الدورة التدريبية و ما راموا يستفادون منها بإهمالهم … مب العود( الكبير ) بعمره … العود يكون بتفكيره و عقله.
و السموحة على الإطالة
أختكم
Melody
اذا الدكاتره جي شو بنقول!؟
و كيف مع اللامبالاة صاروا دكاترة و لا الشي هذا ظهر بعدين فيهم؟
اممم أعتقد عقب ظهر فيهم هالشي اذا قبل عيل على الدنيا السلام
يعطيج العافيه عزيزتي ميلودي
وبالتوفيق..
و الله و أكثر عن جذيه … بس بتم ساكته ما بقول شي
الأستاذ قدوة للطالبة و الطالبات … لو الدكتور بتصرف جذيه شو تتوقعين يكونون طلابه ؟؟؟؟
بصراحة كل يوم أشوف تصرفات يديدة من بعض الدكاترة … و مب الكل
تسلمين الغالية و أشكرج على التواصل و يزاج الله خير
مب العود( الكبير ) بعمره … العود يكون بتفكيره و عقله
عندنا مثل يقول >>>> " لو كل من كبر خذ على من صغر زود .. كان الحبارى فرست بالشواهين " أتمنى أن يصل المعنى ..
وماخفي كان أعظم
صدقتي فكل كلمة كتبتيها … في سوالف و أشياء مهما نخشها لازم بتطلع
تصرف الدكاترة اللي كتبت عنهم تضايج … و هذا حال الأساتذة الجامعيين فكيف بالناس العاديين
مفروض كل واحد يبدأ بنفسه و بعدين يحاول يعدل و يغير فغيره … من هنا البداية
تدرين انا هالشي اكره شي عندي ووايد يضايقني خاصة في الكلاس لما اشوف بنات مايحترمون المدرس ولا يسمعونه ويقللون ادبهم….زين يوم اني لقيت ناس اتحس بهذا الشي مثلي….وهذا ان دل على شي فانما يدل على اخلاقج العالية
يوم اقولج انا اعرف انتي وين اتداومين
المسؤول عن التدريب مب من الجامعة و هو ما يقدر يسكت دكاترة اكبر منه في العمر و المنصب …
و اعتقد انه مب من الأدب انه يقول لواحد منهم لازم تصخ و الا بروغك … يعني مب حلوة
و يحاول يخليهم يفهمون بروحهم ان الحركة اللي يسوونها مب حلوة … بس لا حياة لمن تنادي
ان شاء الله … الله يهديهم … و يزاك الله خير على التواصل و بارك الله فيك
جنسيات الدكاترة … عرب من كليات تدرس عموماً باللعربي
الغالية و انا و اعوووووووذ بالله من كلمة انا ما اداني شي اسمه اهمال و **ل … ما ادانيهم
أشكرج على التواصل و يزاج الله خير
يلا قولي لي بس على الخاص … اكيييييييد في الجامعة في كلية …….. قسم ………….
انا بقول لج موقفين مريت فيهن شخصياً
1- هل انتي عرفتي شوه كان تفكير ومستوى عقول الدكاتره ؟؟؟!!!!
تدرين انا وقت ما قريت موضوعج تذكرت دوره دخلتها اسمها (مهارات الحاسب الالي) اللي يقرا اسمها يقول كل الناس اللي بيحضرونها هم عباقره بس للاسف وقت ما حضرتها انصدمت لبعض المنتسبين واكثرهم لهذه الدوره ( ما كان عندهم اي فكره عن شي اسمه كمبيوتر) و اتبدلت الدوره تلقائيا الى دورة كمبيوتر للمبتدئين والسبب واضح
انا شخصيا ما كان عندي اي اهتمام بالدوره ولا كان عندي اي استعداد اسمع المدرب
2- بعض الاحيان ينجبر الشخص على دوره وهو ماله خص ولا بيكون له خص فيها كيف تبينه يهتم ؟؟؟ طبعا هذا حال بعض الدكاتره الموجودين في الدوله كل يوم مؤتمر وكل يوم اجتماع وكل يوم مهمه وفي الاخير محد مستفيد لا الدكتور ولا الجهة اللي يشتغل فيها
دخلوني دوره وهذه الدوره تبدأ من الساعه 5 مساءً وحتى 9 يومياً من غير الدوم الرسمي وكانت في غير تخصصي . كيف الشخص بيهتم في مثل هذي الحاله ، ما عندنا اهل ؟؟ ما عندنا عائلات ؟؟ ما عندي مشاغل ؟؟؟
كلامج صحيح بس كل شخص وطبيعة شغله ، وما نقدر نحكم على الشخص بدون ما نسمع منه
3- جهات عمل يوصل الها علم عن هذي الدورات بالاميل وعلى طول بعض الموظفين يقدمون على الدوره لانه طلعتهم من الدوام وروحتهم اللي مكان الدوره عليه بدل (فلوووس) ما همهم غير لفلوس
وشكرا
و الله اخويه عندك حق و الشي اللي قلته عن الدورة اللي حضرتها يشبه اللي اشوفه كل يوم … واحد ( الله يستر عليه ) عنده شهادات من Microsoft و غيرها بس لما يحتاي شي … ايي عندي يسألني … و انا اقول شو السالفة … تخصصه علوم الحاسوب و انا تخصصي نظم المعلومات … عقب ما اقول له و ارد على سؤاله و اعلمه يسير يتخقق على غيره … و كلنا موظفين في نفس المكان …
انت ما كان عندك اي استعداد تسمع المدرب … لأن المعلومات كانت جديمة بالنسبة لك و ما الومك لو كنت بدالك كنت خذت اللي يالس حذالي و عطيته كورس و تابعته … عسب يعرف و عسب اطوّر نفسي.
بالنسبة للدورة اللي حضرتها … ما كنت أبا احضرها أصلاً … كانت مب للموظفين كانت للدكاترة و بس … و ما كنت بسير الا ان المسؤولة واثقة مني و رشحتني و عطتني المسؤولية هذي و الحمد لله .
بالنسبة للبدلات … تراها تصير وايد … تلاقي الدكاترة يسيرون الدورات اللي يحصلون عليها شهادات و اللي تكون على حساب مكان الشغل …
يزاك الله خير و بارك الله فيك و اشكرك على المداخلة
ما ادري ليش ما ناخذ الزين منهم