وشلون الرمضان معاكم يالله ما بقى شي شدوا الهمه وستغلوا هالايام الفضيله
وربي يتقبل منا ومنكم صاالح الأعمال يارب
واليوم من صباح الله خير رحت المنطقة التعليمية عسب أعرف بأي مدرسه حطوني وأي مرحله راح أدرس
وصلت المنطقة الساعه 9 طبعا استقبلونا كلنا بالقاعه … وقام الاستاذ الظاهري بالترحيب وألقاء كلمه
وبعد ما رحبوا فينا ووزعوا ورد وكتيبات …. بدأ وقت الجد
رحت عسب اعرف وين بحطوووووووووني
ويوم قالت لي اسم المدرسه جاااااااااااااااااااان انصعق زين ما صحت
خلوني أدرس مرحله ثانوووووووووووووووووووويه
ويني أنا والثانويه وين لا خبره ولا شي أول سنه كيف حطوني بالثانويه
قلت أنا دراسه تربيه مرحله ابتدائية كيف حاطيني ثانويه مابي حرام الطلاب ينظلمون معاي
قالي نحن اخترنا أول ثلاث معلمات اللي يابوا درجات عاليه بالاختبارات يعني انتي متميزه
قلت له وانت شدراك اني متميزه هذا ويهي وحده متمزه >>>>كنت بصيح يدامه
قال انتي الحين روحي باشري العمل بعد اسبوع راجعينا <<<طلع ما منه فايده
شل اوراقي وراح للموظفات وقال لهم الموضوع
فردت عليه وحده قالت : أن المدرسه راح تكون متعاونه معاهم وراح ادربهم >>>>>>قهرتني
قلت لظاهري ما اقدر ادرس ثانوي أنا اعرف مستواي واعرف عمري
قالي خلاص نهية الاسبوع تعالي
طبعا المدرسه أوكى والاداره ماشاء الله عليهم ما عليهم كلام
بس المشكله فيني ما اتخيل ادرس بنات اكبار ولا ما اظن راح اكون متمكنه من المنهج
أنا بالتدريب اذا ياهل صف 5 صيحني كيف وحده بالثانويه تقط علي كلمه شو بيصير فيني
اللي عندهم خبره بالتدريس قولولي شو اسوي ؟؟؟؟؟؟؟؟؟؟؟؟؟؟؟؟؟؟؟
هلا هلا صدووي
اول شي مبرووك عليج الوظييفه
امبييه ثنويه عاامه هو على حسب الماده
بس لازم تكونين قويه اذا انتي تقوليين وحده صف خامس صحيتج الله يعنيسنج من بنات الثنويه فيها لشين وفيه الزيين
بس لازم تتحمليين بس بقولج شي اي بنت تسويلج شي لا تسكيين لها لو تسكيتين لها بتتمااد
على حسب المنهج انتي شوفي الوضع هالاسبوع واذا صار شي ردي الوزاره وشوفي الوضع
خل تفييدج ابله شموخ
موفقه عزيزتي ^_^
كنت أحاتيج إنج تكونين ف مدرسة بعيد
بس زين طلعت قرب بيتكم ….
ما عليج من الأفكار اللي تدور ف راسج ….. شو يعني يصيحونج …..
صدوه ….. ركزي معاي …. صدقيني تدريس الثانوي متعة ما بعدها متعة ….
وغيرج ندم إنه رفض الثانوي وما راح ع طول بعد ما جرب حلاوة الثانوي ….
مهما كانت المادة لا تحاتين ….
وبالع** بنات الثانوي يعتمدون ع أنفسهم أكثر من غيرهم
لا تنسين التقويم المستمر شاغلنهم تخيلي حتى ع سلوك الطالبة ( خانة الملاحظة ) درجات
شو بتسوي البنت يعني …. مسكينة والله تبغي حد يحتويها ويساعدها ….
ولا تنسين إن الولد اللي بالخامس ما يتقارن بطالبة الثانوي ….
أولاد خامس … افهمي أولاد يعني زيادة حركة …. وشطانة …. وضرابه …..
والله وحدة تبكي من أولاد خامس تخيلي تقول أول ما ينزل المطر يفصخون دشاديشهم ويراكضون ف المطر
ويالله يا مدرسات ركضوا وراهم عن حد يطيح …. يعني هذي حالة تبغينها ….
حمدي ربج ما طلعتي ف مدرسة أولاد …..
وإلا بتكون وهقة صدق ….
عقب بتنزلين مواضيع ( صدى تجري خلف الأولاد )
وبنخلي الأمير يشيلج م الإشراف
خلص ما تنفعين صدق ….
اقتنعتي بعد هالكلام وإلا …..
وبالبركة إن شاء الله ….
[/align]
عزيزتي صدى الأحزان توكلي على الله وجربي أول أسبوع وان شاء الله راح تتوفقين.
ومثل ما قااالت عزيزتي نور الامارات الثانوية أحس لأن حركتهم وسلوكهم محدود وتقدرين تاخذينهم بأسلوب وسياسة معينة..
صلي الاستخارة وتوكلي على الله واذا الله كاتبلج فيه الخير راح اتلاقينه ان شاء الله واذا مارتحتي فتوكلي على الله وسيريلهم الوزارة..
دعواااتنا لج عزيزتي، ربي يوفقج ويسهل عليج شغلج ويعطيج خيرها ويكفيج شرها يارب..
ربي يرضى عليج دنيا وآخره يارب..
وربي يتقبل منا ومنكم الصيام والقيام والعمل الصالح يارب..
والسموحة..
[/align]
بتكونين صداقات روعة مع الطالبات ….
وأعرف وحدة توفى أحد أقاربها ( وكان شخص عزيز جدا ) وهي تدرس بنات ثانوي …
تخيلي بعد فترة صارت إحدى طالباتها معلمة ….
وكانت هذي الطالبة يتيمة الأم ومتبنتها كأم لها …
وتزوجت البنت وحملت وسمت ولدها على قريب معلمتها ….
طبعا بعد ما استأذنت زوجها ووافق ….
شفتي لوين ….
فتنعمين مع الطالبات بعلاقات أخوية روعة ….
وصدقيني الخبره بتكتسبينها من خلال تدريسج لهم..
والمدرسات ما بيقصرون وياج ان شاء الله ..
حرمة اخويه شراتج خلوها في مدرسه ثانويه وسوت شراتج
لكن الحمدلله اتوكلت على الله والمدرسات ما قصروا وياها وعطوها كل محاظراتهم ..
انتي خلج قويه بس
السلام عليكم ورحمة الله وبركاته
يا نور من قريت كلامج احترت اشوووووووووووي
بس من يوم رحت المدرسه ما ادري طول الوقت قاعده افكر واحاتي ..أنا مب مشكلتي ويالبنات أنا مشكلتي مع المنهج
خايقه اكوون مب متمكنه منه لانه في اشياء أنا ما درسته ولا عندي خلفيه عنها مثل العروض وشرح الابيات ..الخ
حتى وحده من المدرسات قالت انتي شكلج مب طبيعي بتفكري في أيه اذا مش عاوزه الصف 10 معلش خذي 11
قلت في قلبي ياليت يت على الصفوف انا في وادي وهي مسكينه بوادري
أم سعود :
مافي غير اني اصلي استخاره وصليت وربي يسر الأمور يارب
صمت الجروح:
كلامج مثل كلام اختي لازم اقوي شخصيتي
على قولة امي اللسانج بالبيت برع البيت جنج ذبابه طايحه بالماي >>>حتى امي تعرف اتشبه
والطامه انه المدرسات قالوا أن البنات الثانويه اللي عندنا ما يبشرون بالخير لازم يكون عندج طولة بال
ريما:
المدرسات إن شاء الله ما بقصرون معاي ولا مع الغير وربج بيسر الأمور يارب
بحاول العلع شوووي وطلع لي اللسان ههههههه
وتسلموون والله على النصايح ربي يسعدكم دنيا واخره يارب
[/align]
وإن شاءالله بتقدرين على طالبات الثانوية ..
صدى … حاولي تشترين كتب ف العروض والنحو
وإذا محتفظة بكتب الجامعة تنفع ….
ولا تنسين قوقل ما يقصر الحين أبدا ….. هو خير صديق وقت الأزمات
تعرفين إن الدروس أغلبها عروض بور بوينت بتشوفينها جاهزة وأحيانا التدريبات محلولة بعد …
بس إدخلي مدونة منطقة الشارقة
وتعلم لأجل الإمارات
ومدارس الإمارات
وبترتاحين آخر راحة
وع فكرة طالبات الثانوي يدورن بروحهم ويساعدونج
وكله بأجره ….
مرحبا اخت صدى،
الله له حكمة و اكيد كتبت لك هاشي لانه فيه خير لك،
تجربة جديدة تتعلمين منها تصقل شخصيتك،
يقولك الضربة الي ما تموتك تقويك،
اذا انتي زي ما وصفتي نفسك وزي ما وصفتك الوالدة الله يحفظها فاعتقد راح تستفيدي كثير:
عمليا و شخصيا
موفقة بإذن الله … لك مني أجمل تحية .
cute,,
صدوي انتي دوم مايعيبج العجب
ترا بيفنشونج
ماعليه تتحملي لسان بنات الثانويه والا تتحملي وصاخه عيال الابتدائيه !!
وبالتوفييييييييييق
.
.
[/align]
اولا مبروك عليكم بداية العام الدراسي والله يوفقج وماوصيج هالله هالله بالذمه في تعاملج مع الطالبات
واما بخصوص المرحلة الثانوية
فدايما انا احط في بالي هالشيي
انا موجود فإذا انا انجز مهما كانت الصعوبات
فإن شاء الله بتحصلين صعوبات في البداية ولكن بتندمجين مع الوسط وبتمشين بإذن الله
والله يوفقج يا صدى
وتقبلي مروري
أخوكم محمد خليفة