ومع كل تلك الصعوبات فأنهم يتمنون العوده للعيش في تلك الاجواء الحافله..
الــغــوص عن الـــلــؤلــــؤ
كان يتم في فصل الصيف ويمتد من 10 ايام الى 4 اشهر …. يعتمد على حجم السفينه والمؤونه
بعد اذان الفجر وعند طلوع الشمس يتجهون للهير* وتبدأ عمليه البحث… طبعا بعد ما يتريقون سح ….
الغيـــص او الغواص … يحمل الديين* على رقبته ليضع فيها المــحـار ويمسك حبــل في نهايته حجر او ثقل ليساعد الغواص على النزول بسرعه … وما ان ينزل الغواص ويوصل للقاع .. يقوم الســيــب بسحب الحجر .. وينتظر الاشاره الثانيه ليسحب فيها الغيص للسطح بسرعه .. علشان ما يختنق الريال … وفي هذه الاثناء في مجموعه ثانيه من الرياييل وبعض الصبيه يقومون بــفــلـــج المحار لاست***ج الــلــؤلــؤ …
عمليه فلج المحار مب وايد صعبه بس يبالها تركيز … يعني الي يهذرب وايد ما يلقى شي ..
يستخدمون ادوات بسيطه .. منها
المفلقه: وهي اداه حاد مصنوعه من و الحديد الها راس مدبب ومقبضها من الخشب … علشان يقدرون يبطلون المحاره و يدورون فيها على اللولو
الفلس: عباره عن صدفه فاضيه … يعني منظفينها عن اللوينه* "الكائن الحي الي يعيش في المحاره" ويمعون فيها اللولو الي يحصلونه وكل واحد عنده صدفه علشان يحط فيها الي لقاه
ويضلون على هاي الحاله لين اذان الظهر …
يصلون الظهر ويتغدون واذا حد منهم عطشان يسير عند الفنطاس* و يشرب الماي بالقبعه*… وياخذون راحتهم لين اذان العصر .. ويردون مره ثانيه يغوصون … لين المغرب ….. بعدين يصلون المغرب ويتعشون سمج مشواي وعيش ويرقدون .. بأنتظار يوم شاق اخر ..
وتمشي الايام وهم هاي حالتهم … لين ما يي القــفــال وهو موعد الرحيل …
الــــســردال هو الي يخبرهم عن موعد القفال ….. والسردال عباره عن سفينه تكون كدليل للسفن الثانيه .. تدليهم اماكن الهيور … وتخبرهم هن نهايه موسم الغوص …
صاحب السفينه يطيّر نشره …. الي هو علم دبي سابقا "الابيض والاحمر" والي ما يعرفه يسير يشوف توقيع حكومي
يوم يردون من الغوص ويوصلون البلاد …. الطواويــش* يكونون في انتظارهم على احر من الجمر علشان يشترون حصيله هالموسم من اللولو …
الكل يجتمع في بيت النوخذه ويتم البيع ….. يقوم النوخذه بعدين بتقسيم الارباح
كنت بخبركم كيف يحسبون الارباح … لكن نسيت كيف يحسبونها … هيهيهي
كل المعلومات الي قريتوها .. خبرني عنها الوالد في احد جلساتنا العائليه … والي عنده اي تعليق او استفسار .. او حتى تصحيح يتفضل …
** ملاحظات **
الـــهير*المنطقه الي يتواجد فيها اللؤلؤ
الديين* سله تعلق في رقبه الغواص ليضع فيها المحار
اللوينه* الكائن الحي الي يعيش في المحاره
الفنطاس* نقدر نقول عنه خزان الماي ويكون متواجد في الخن "بطن السفينه" ومغطى بالواح من الخشب عن يتوصخ
القبعه* كأس صغير وبه حبل يغطونه في الفنطاس علشان يظهرون منه الماي
يي القــــفال* وهو موعد الرحيل الي الديار
الطواويش* تجار اللؤلؤ
والسموحة 😉
ذكرتيني في البحر :rolleyes:
مشكور على المداخلة 😀
والسموحة 😀