نظرا لضيق وقتي بدخل على طول في الموضوع ..
في ظواهر مب حلوة منتشرة في أغلب الايميلات الإسلامية " إلا من رحم ربي " خلتني أكره اقرى ايميلات محتواها وموضوعها شي ديني ,,
.
.
.
اول شي سالفة القسم ,, وانت في عز اندماجك في الكلمات تنصدم بجملة
"أقسم بالله العظيم سأبعثها للآخرين" ,, أو أحيانا في بداية الايميل تشوف مكتوب " أقسم بالله العظيم سأقرأ الايميل "
انزين ليش هالاسلوب ,, ليش تجبر القارىء على شي وانت مب عارف شو ظروفه ,, يمكن مشغول و ماعنده وقت يطرش ايميلك او يقراه ..
يعني قلّت عليهم الاساليب !!!!! شي فعلا يقهرني وينرفزني …
ثاني شي ,, تقرا الايميل ويكون محتواه بس كمن سطر لكن مايتبع هذا الايميل يوصل صفحتين وكلها عباره عن تهديد و وعيد اذا ماطرشت الايميل ,, اعتقد جملة انشرها ولك الاجر تكفي ,, اللي يبا الاجر بتكفيه هالجمله ليش كل هالمطولات اللي تتبع الايميل الاصلي ولا اكثر شي يقهرني يوم يكتبولك " فلنرى إن كان الشيطان يستطيع أن يتغلب عليك " ,, ليش الشيطان يقص عليه ,, اصلا انا مابحصل اثم لو ماطرشت الايميل !!!!!!!!!! يعني مب فرض عليه اطرش ايميلك ؟!!
ثالث شي ,, تحديد عدد اللي لازم اطرشلهم الايميل ,, يعني يا بيقولولك ابعثها لجميع من عندك أو يحددولك رقم مثلا ابعثها لعشر من اصدقائك أو whatever ,, انزين يمكن انا ما عندي العدد اللي هم محددينه ويمكن ما اقدر اطرش حق كل اللي عندي مثل دكاترتي ,, يعني ليش اضيجون ع الناس وتحطون ارقام وخربطان ,, ياجماعة جملة " انشرها ولك الأجر " كاااااااااااااااااااااااااااافية
رابع شي ,, قامت توصلني احاديث وقصص ذات طابع ديني مادري من وين يايبينها عيزت وانا اتأكد من صحة الاحاديث اللي توصلني ,, واكتشفت ان في وااااااااااااااااايد احاديث لا اساس لها من الصحة وتكون للأسف منتشرة يعني مب هالشي يحز في الخاطر ,, مب بس يحز في الخاطر الايقهر بعد ,, أول كنت ادور على صحة الأحاديث ,, بس احينه عشان ماعندي وقت قمت الحديث اللي ماعرفه على طول دليت ,, مب الأحسن يحطون مصدر الحديث وصحته عشان الواحد يطمن ويرتاح نفسيا ,,
هذا بعض اللي اذكره من الاشياء اللي تقهرني في الايميلات ذات الطابع الديني ,, يعني المفروض الاسلوب يكون أرقى ,, عشان الواحد يقبل على هالنوع من الايميلات ويحرص على نشرها " بالطيب " عشان ي**ب الاجر ,, مب بالغصب كأن حد ضاربنه على ايده وقاله طرش الايميل او اقراه
وهذا بالاضافه إلى أهمية تنسيق هالنوع من الايملات وترتيبها عشان الواحد تنفتح نفسه مب يحطون خلفية سودا ولون الخط أصفر أو أخضر فاقع ,,
يعني شو بنقول … الله يهديهم بس << مادري ليش هالجمله حسستني ان عمري 70
الواحد الصراحه يزعل يوم يشوف الايميلات المفيده جذي يكون حالها وخاصة الدينية ,, والايميلات الثانية أسلوبها ممتع وجذاب ,,
هذا رايي في هذا الموضوع ,, حابه اعرف رايكم هل انتوا تؤيدوني ولا تشوفون اني مكبره الموضوع
بنشوف اذا الشيطان بيقدر يقص عليك ويخليك ماترد عليه << لوووووول
سبحانك اللهم وبحمدك أشهد أن لا إله إلا أنت أستغفرك وأتوب إليك
وأصلان لما يوصلج أيميل يوصل أقل شي 5 مكرر من أصحاب ثانيه
واحد يوم يبى يطرش يطرش من نفسه مب من تهديد
السمووووووووووووحه
هدي اعصابج الصغيرونه مايستاهل تسوين بعمرج كل هذا
فعلا كل اللي قلتيه في محله
كلاسيكي
انا الصراحه اشوف هالموضوع وايد يقهر يمكن لان انت ماتوصلك 50 رساله من هالنوع في كل يوم ,, احس يتني فوبيا من هالايميلات
بروح اذاكر احسن لي ,, الله يعيني !!
شكلج متعقدة من عمرج يوم تبطلين الايميل ولا الرسايل اللي توصل ع الموبايل
انا طرحت هالنقطة وناقشتها وياكم ف سلسلة موضوعي ((سوالف)) مب متذكرة اي جزء كان
فعلا شي يضايق يوم يحطون لج تهديد ووعيد ولا حلف قبل ولا بعد القراءة
خلو كل شي يكون بنفس راضية مب غصب
ويجب ان نهتم ان لا نذكر اسم الله عز وجل فى تلك الامور التافهه
و شكرا منك الطرح
<<<— لازم أرد السلاام ^_^
صدقتي عزيزتي،،
كثير من الرسائل تصلنا بنفس الفكرة وإن اختلف مضمونها
وأحياناً استغرب لما ربيعاتي يطرشون لي رسايل من هالنوعية
أقول معقولة يكونون فعلا مصدقين هالخزعبلات
(خصوصا لما يقول انك لو ما ارسلت الرسالة لعدد من الناس راح يصيبك مكروه !!)
وللأسف،، في نسبة كبيرة من الناس تصدق هالخرافة
بالرغم من تقدمهم بالسن او حصولهم على تعليم جامعي وغيره!!!!!
أحيانا، توصلني رسايل فيها ذكر وتسبيح والأخير دعوة لنشر الرسالة أو الجملة اللي ذكرتيها
((بنشوف اذا الشيطان بيقدر يقص عليك وبيمنعك من إعادة ارسال الرساله))
طبعا إذا حسيت ان مضمون الرسالة سليم ومافيه شي أمسح السطر الأخير هذا وأعيد ارسالها
مع مراعاة اني ما اكرر إعادة ارسال الرسالة أو فكرتها أكثر من مرة … ^_^
والسموحه منكم ع الاطالة
سكتي وانا اكتب لج الرد توه وصلني مسج …مكتوب فيه لا إله الإ الله …طرشي حق 9 اشخاص عشان تسمعين خبر حلو …شو بلاهم الناس ؟؟؟؟؟؟؟؟؟؟؟؟؟؟
الله يهديهم إن شاء الله
عقب بديت أسولهم طااف
جان زين يسمعون هالرمسه لان فعلا اسلوب متخلف
هاني ,,
شكرا للمشاركه وابداء رأيك
نجمة الأماني ,,
صح اللي تسوينه ,, أنا أحيانا بعد إذا كان المحتوى مفيد ارد اطرش الايميل للباجين بس عقب ما امسح كل اللي يعقب الايميل ,, وسالفة اللي يصدقون ان اذا ماطرشوا الايميل بيجيسهم مكروه فعلا شي استغرب منه كيف بصدقون هال***بيط !! نقطه اشكرج لطرحها
و لا ابدا موليه ماطولتِ كان يهمني أسمع آراءكم ,, شكرا للمرور
قصايد ,,
الله المستعان شو بنقول بس ,, سالفتج ذكرتني بسالفه استوت لي ,, مره وصلني مسج من رقم غريب شرات هالمسج ,, فرديت على راعيته مابطرشه ,, جان ترد عليه خافي الله هاي اذكار ,, جان ارد عليه ماقلنا شي بس سالفة اني بسمع خبر حلو عقب ماطرشه حق عشر ها ***بيط ,, وفي النهايه اقتنعت واعتذرت لي شكرا ,, لمرورج وابداء رايج
ظل القمر ,,
وانا بعد قمت اسوي طاف لهالايميلات ,, شكرا لمرورج