السلام عليكم و رحمة الله و بركاته …
اخواني و خواتي …
كيف حالكم ؟؟ إن شاء الله بخير و صحة …
اليوم حبيت اكتب لكم الموضوع هذا … و حبيت الفت انتباهكم لشيء حلو يمكن ما نحصله وايد في ايامنا هدي …
كنت يالسة ويا الوالدة الله يحفظها و يطول بعمرها .. الله يحفظ لكم امهاتكم و يطول بأعمارهن يا رب …
كنت اشكي لأمي من ولدي عبدالله ..
اقول لها : امي شوفي عبود ولدي ما يسمع كلامي .. شوفيه لازم اركض وراه هنا و هناك .. الأولاد متعبين و الله … ما اصدق انا سويت جذا يوم كنت صغيرة ..
ردت عليه أمي فديتها بأسلوبها الحلو و بهدوءها اللي يخلي المحرج يهدأ و الزعلان يفرح: شوفي يا ورد انتي كنتي تسوين حركات اكثر عن ولدج و وانا تحملتج شراة ما تتحملين ولدج الحين شوفي يا بنتي .. انتي متضايجة من ولدج ؟؟ مب هذا ولدج ؟؟
أنا: امبلا ولدي
أمي: زين ليش متضايجة ؟؟ كل الصغاريه جذيه ..
أنا: زين أمي هو يباله حد يركض وراه و يشوفه و انا ساعات اطفر او انشغل عنه .. شو أسوي؟؟
أمي: احمدي ربج اللي عطاج هالولد .. و حرم وايدين … خليني اقول لج هالقصة و هي حقيقية و صارت و انا اعرف صاحبتها … حرمة تزوجت لكن ما احملت.. حاولت تتعالج هي و ريلها لكن … سبحان الله ما احملت و ما عندها عيال … تمت تفكر كيف يصير عندها ولد .. هي و ريلها يبغون ينجبون و يكون عندهم صغاريه .. لكن سبحان الله الله حرمهم من هالنعمة …
تقول سارت لملجأ الأيتام >> طلبت تاخذ طفل من عندهم تربيه و يكون ولد لها … تقول كانت الإجراءات طويلة و عريضة .. تقول تمت الحرمة و ريلها شهور يتابعون الإجراءات عشان يحصلون طفل يربونه و يكون ولد لهم … وأخيراً بعد صبر و إجراءات حصلوا الولد …
تقول كان صغيييييير ضعييييييف عمره يمكن شهور … تقول ودته الحرمة عند اختها عشان ترضعه فيكون ولد اختها بالرضاعة ويكون لها محرم … و سبحان الله ترضعه اختها و تعطيه للحرمة اللي طلبت تربيه .. و صارت تربيه حتى دخل المدرسة و كمل تعليمه الثانوي و نجح و تخرج …
تقول احنا نخفي عنه انه مب ولدنا و نخاف يسمع هالكلام من أحد … سبحان الله
انا يوم اشوف ولدي مطفرني ساعات احرج عليه و ساعات اطنشه و مرات لما يطفرني اقول له سير عند يدوّه .. و هالمسكينة تدوّر ياهل تربيه و يكون مثل ولدها … لما اشوف التعب مع ولدي استغرب من قلب هالحرمة كيف تتحمل و تصبر على ولد مب ولدها و تربيه و تسهر على راحته .. سبحااااااااانك يا رب … الحمدلله رب العالمين
الله يحفظ لنا عيالنا و يبلغنا فيهم و يبارك فيهم يا رب ..
بقلم اختكم
ورد الجــــوري
ام عبدالله …