للنقاش ظاهرة غير حضارية و غير لائقة بالمجتمع 2024.

كم مرة فمرة و انت يالس ويّا الأهل و فجأة تسمع جرس باب بيتكم يرن، تطلع الشغالة و ترجع تقول ماماه في واحد مسكين يبي فلوس، عاد انت تنش و بشهامة و تعطيه من البيزات اللي عندك، و حاط فبالك و بكل طيبة قلبك انك تبي تحصل أجر و تساعد المسكين، بكل اختصار هذي اسمها ظاهرة التسول.

الواحد منا يشوف العجب من المتسولين، يعني بعضهم يرضون بالفلوس بس يعني لو تعطيهم شيء ثاني غير الفلوس ما بيرضون ( مثل ما ينقال طرار و يتشرّط ) ، و البعض الثاني يرضون بالفلوس و الأكل و البعض ياخذون اي شيء تعطيهم اياه ( فلوس … أكييييد و ثياب و أكل يعني عيش ( أرز) للي ما فهموا كلمة عيش، شكر ( سكر ) و خبز ).

بس السؤال اللي يدور في بالي هل كل المتسولين محتاجين … أكيد لا و أقولها بصوت عااااااااااااالي لا.

لا تحطون في بالكم ان كل الطرارين ( المتسولين ) محتايين، سالفة قالتها لي ربيعتي ، وحدة كل يوم تروح اتطر و تدخل عليهم بيتهم تترجاهم، وهم ما شاء الله عليهم مب أي ناس، لين أهل البيت اتضايجوا منها ابوها دوووووووم مشغول فراح عمها عسب يعرف منو هذي اللي كل ما عطوها تطلب زيادة ، لحقها و لا يشوف الصدمة … الطرارة عندها سيارة مرسيدس راهية غاوية و يديدة… يا سلام منو قدها.

😮 😮 😮

واحد شيبة مليونير كل ما تروح السوق تلاقيه يطر، لا و يالس في نص الدوار، ليش يطر ما ندري، حتى مرة يحليلها ربيعتي سايرة السوق فالليل تقول والله ما شفته كنت بتخرطف و اطيح عليه، لأنه دوووووم يالس يطر يعني الواقف ما يروم يشوفه وسط الزحمة و فالليل.

:rolleyes: :rolleyes: :rolleyes:

Ok لو شفت حرمة تطر أو ياهل أو واحد شيبة … راح تقول مسكين أو مسكينة محتاية و محد يصرف عليه أو عليها و ليش ما احصل اجر في هالمسكين و اساعده، مع ان واااااايد منهم مب محتاجين و يمكن بطرانين بعد، بس لما تشوف واحد شاب يطر ودّك تذبحه، يعني ليش ما تشتغل، طبعاً الشيء هذه ما ينطبق على الكل بعضهم عندهم مشاكل و ظروف تهّد الحيل و ت**ر الظهر … الله يعينهم .

· مب محتايين الدليل …

– طرارة يت تطر، عطتها صاحبة البيت فلوس و عطتها عيش، عقب مدة ظهرت صاحبة البيت ولا تشوف كيس العيش محطوط في الشارع حذال درام ال**الة … ليش يعني الطراروة ما يبون ياكلون و لا بس محتايين فلوس … تراها نعمة و حرام تنعق في الشارع … ترى النعمة زوّالــــــة.

– طرار يطر شايل ويّاه كيس عووووووود ( كبير ) فيه دراهم ( coins) يلست اطالع انصدمت و يلست اسأل الوالدة ليش يطر ترى عنده واااااايد، يلست افكر كم يوم يلس يطر عسب يمّع كل هالبيزات و الله من كثر البيزات اللي شايلنهم ويّاه تحس الكيس بينطر.

* يرومون يشتغلون بس …

طرار … شاب في سن المراهقة أو الشباب، ياي يطر في السوق، و يمد ايده … الله اعلم بظروفه بس مهما يصير انت بعدك صغير و تروم تشتغل ، ليش تطر؟!!! كان مصيره انه انراغ من المحل اللي طرّ منه و من الناس اللي فيه.

اندق مرة جرس باب الحوي، طبعاً انا و اعوذ بالله من كلمة انا ما راح افتح لو شو يصير، اتأخرنا شوي على اللي دق الجرس، و لما فتحنا الباب ما حصلنا حد !!! المهم رحت اطالع من الدريشة ( النافذة ) الحلو ان الزجاج العا** يسترك، حصلته طلاّب ( طرار ) راح بيت يرانا ( جيرانا ) يطر بعدين فتحت الحرمة الباب حصلت الطرار جدامها و الطرار حاول يستعطفها و أشــــّر على ايده اليسار ( يحاول يفهمها انه مصاب أو محترق أو متعــــّور ) عطته بيزات و بعدين هو روّح، بصراحة انصدمت والله مب شيبة بعده صغير و يروم يشتغل، لاحظت و هو ساير بيت يرانا اللي حذال البيت اللي طرّ منه مشى من تحت الغافة ( شجرة الغاف ) و بايده اليمين شمط منها ورق، Ok يعني هو يروم يشمط ورق الغافة بايده اليمين و ما يروم يشتغل بها، ثانياً ايده اليسار هي المتعورة يعني اليمين ما بلاها شيء.

:confused: :confused: :confused: 😮 😮 😮

* مثال رائع …

كم مرة فمرة ، يندق جرس الباب، فتحصل واحد يعرض عليك تنظيف النخل و ترتيبها اللي عندك في البيت، طبعاً انت تحب تساعده و تقول له : هيه … نعم ، لو انت مب محتاي بس لأنك تحب تشجّعه، و تشجع أمثاله، نوع ثاني ايمعّون ( يجمعون ) الكراتين من الشوارع بس و الله أرحم من الطرارة و أعـّـــــز و أكرم لــلنــفـس .

الرسول صلى الله عليه و سلم يقول : " لأن يأخذ أحدكم أحبله، ثم يأتي الجبل فيأتي بحزمة من حطب على ظهره، فيبيعها، فيكف الله بها وجهه، خير له من أن يسأل الناس أعطوه أو منعوه ".

اسمحولي على الإطالة

أختكم Melodyخليجية

انا اعتقد انها مسئله نيه

بعدين هالظاهره تلاشت من زمان

وبيت الزكاه مو مقصرين وانا اعتقد محد يمد ايده الا المضطر

مرحبا اخوي جرح

و مشكوور على الرد و التواصلخليجية

كلامك صحيح بس الظاهرة بعدها موجودة و محد ينكرها

و القصص اللي في الموضوع حقيقية 100%

سوري ميلودي انا بالاول ما كنت ابشكك برفيجتج

لاكن طراره بنز ما تعتقدين انها قويه شويه

و الله تصير … طراروة بس ميلونيريه ( ميلونيريين )

و الله الواحد يسمع و يشوف فهالدنيا:o

الصراحه موضوع ما عليه كلام
صدقت اخويه ميلودي…هذا شيء متعب
انا عن نفسي..مره كنت في محل..وفتحت الباب وحده وانا كنت جريبه منه…ويلست تتكلم بصوت واطي ما اقدر اسمعه..بس اللى فهمته انها اتريدني ايها برع المحل..وبعدين علت صوتها وقالت تعالى اريدج اشويه..انا الصراحه خفت..وحده متنقبه و ت**رني..طاح قلبي..ما طعت اسير..والحمد لله راعي المحل صرخ عليها وقالها شو تبين..ونصدمت طراره و تشرط..يايه اطر من عندي..وتشرط عليه…

واللى عرفته اخواني انه من فتره..في مجموعة ريايل(رجال) بتنقبون..وطرون في لبيوت…بس اخواني..اتحملو منهم لانهم يوم اروحون اصحاب البيت ايبون المقسوم…هم يستغلون الفرصه..ويصرقون(حراميه)او ارقدون اصحاب البيت بمخدر…
الله يحمينا منهم ومن امثالهم…ويرحمنا شر النقاب..اللى صرنا انشوف مضاره اكثر من نفعه……….

اسمحلى على المداخله…وطولت عليكم
الله يحفط الجميع انشاء الله

اخي ميلودي..
اخواتي واخواني
ما تلاحظون الفتره هذي في الدوله..اصحاب الجرائد (البياعين)اطرون من عندنا..غصب طيب لازم نشتري من عندهم..ووقفون عند الجامه غصبن عنك تشتري..بس اللى حاصل ان الناس صارت تعطيهم فلوس من غير ما تشتري..عشان جي كبر راسهم…وستغلو الشيء هذا لصالحهم…
يزاج الله خير اختي الفرنسية

و الله اللي يصير ألحين يرفع الضغط

انا صار لي موقف في السوق … و صاحب المحل راغ الطرارة

المشكلة يت تطر مرتين و لو تروم بتطر منج اكثر…

الله يعين بس

————————

ملاحظة : اختي الغالية انا بنت مب ولد#G# خليجية

صح كلامج وهالقصص سامعتنهن
انا بقولكم سالفتي
مرة في رمضان الساعه 12 الفليل محد كان في البيت غير انا وأمي
انا كنت يالسه في الصاله تحت و امي فوق فدشن عليه حريم متزكرتات لبس كشخه والماس وحاله
انا تحريتهن ربيعات امي فرحت ا**رها يوم يت الوالدة قربنابهم ع الفواله امي طلعت ماتعرفهم وتقولي منو اقولها ما اعرف عقب تمن يشكن حق امي طلعوا:eek:طلابات
احين هذيلا معقوله محتايين:rolleyes:

ما تلاحظون الفتره هذي في الدوله..اصحاب الجرائد (البياعين)اطرون من عندنا..غصب طيب لازم نشتري من عندهم..ووقفون عند الجامه غصبن عنك تشتري..بس اللى حاصل ان الناس صارت تعطيهم فلوس من غير ما تشتري..عشان جي كبر راسهم…وستغلو الشيء هذا لصالحهم…

هذيلا اطنشهم … و ما اعطيهم ويه

بس ذكرتيني بسالفة … كنت رايحة شيشة البترول نزلت اشتري … لاحظت ان اللي تبيع في المحطة تحاول تقنعني اشتري زيادة … و انا ما ابا … شو يعني غصب و يومها كنت مزجمة … طنشتها و طلعتخليجية

————————————————————-

و حليلج حلوة دبي …خليجية

سالفة استوت ليدتي … اندق باب الحوي … و عقب مدة دخلت وحدة ريحة العطر تبط الخشم ، و الثياب من اغلى ما يكون … راهية

و ماخذه راحتها و تتمشى ويا يدتي( و يدتي ما تعرفها )و القهر تقول نها بنت ناس و بنت اصل و فصل لين ما وصلت باب الصالة … جان يطلع الوادل و يه**ها و يروغها و يسكر الباب وراها … طلعت بعدين طلابة

صراحه اختيار موفق و موضوع جميل..
و المفروض الواحد ما يرد السائل ابدا حتى لو كنتي مقتنعه داخليا انه مب محتاج..لقول الرسول صلى الله عليه و سلم..بما معناه: لا ترد السائل و لو جائك على فرس.. و الفرس ايام الرسول كانت شي يعني ما عند غير عيال العز..
فالمفروض دايما انك ما ترد السائل و لو حتى بدرهم..
هاي نقطه

اما النقطه الثانيه سلمكم الله..خلوني اخبركم السالفه..كنت اتسوق و ياني طلاب من هاييلا اللي يراون اوراق و جذيه..فتحت البوك و عطيته كل اللي فيه…يعني كل شي كل شي و هو شاف..و اصلا يتمنى حد يعطيه هالمبلغ..<< ما اتخقق والله بس سمعوا السالفه
خذهم و رد يقول عطيني بعد و هالاولاد مساكين و ما اعرف شو؟؟ بصراحه بحلقت عيني فيه..تراك تشووووف البوك خالي..شو تستعبط لي؟؟
حرق اعصابي الصراحه..عنبووو مب طمع فيهم..استغفر الله..

و السموووحه منكم
#G# #G# #G#
#G# #G#
#G#

أنا أتفق مع متوفيه في ان المفروض ما نرد السائل مهما كان حتى لو درهم للحديث اللي ذكرته عن النبي صلى الله عليه وسلم ..

وأتفق وياج ميلودي ان هالزمن محد قام يعرف المحتاج من اللي مو محتاج 🙁

وصارت لنا نحن بعد سالفة ونحن سايرين مره العمره مع اخوي عن طريق البر … وقفنا عند محطة بترول ونحن نتريا شوي وتوقف عند سيارتنا سيارة ونزل منها هندي كاشخ ودق الجامه على اخوي وتم يرمسه وشوي اخوي يطلع بيزات ويعطيها الهندي ..

كنا نراقب اللي يستوي وبعد ما سار الهندي قلنا حق اخوي شو علاقتك بالهندي وليش تعطيه بيزات :confused: قال ما عرفه هذا طرار يبي فلوس 😮 اتخيلوا احينه كشخه يطر وهو راكب سيارة :rolleyes: :confused:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

Scroll to Top