قصة الحب الحقيقي

" يالله بسرعه عويش الله يخليج , ورانا درب " قالت ريم وهي تعدل شيلتها , ردت عايشه وهي نعسانه : " زين زين , من البارحه العرب في المستشفى وانتي الحين متفيجه تسرين عليهم ؟؟ " ردت ريم : " والله انج يا عويش !! انا توني دريت ولو مب اني داقتلها والا كان ما عرفت السالفه من الاساس " ردت عايشه بضيق صدر : " خلاص زين والله اني أدري بس بعده الدريول ما وصل , من سار يودي اليهال ما رد , وانتي الله يهديج منشرتننا من صباح الله خير " قالت ريم بعصبيه : " أقولج يلسي وحطي راسج وارقدي , ما أباج تسيرين وياي ولا الله قال زين ؟؟؟ " ضحكت عايشه وهي تقول : " والله ريموه تراج صايره نار , ومحد يقدر يرمسج والا يسولف وياج , يالله حبيبتي انا زاهبه ونتريا الدريول لين يوصل , هذا هو وصل ,,,,,, يالله ركبي السياره "

قام علي على صوت تيليفونه يصيح وما انتبه على الرقم ورد : " ألووو " رد صوت خالد : " علوي , قم بنسير المستشفى عند بو موزه بنشوف شو حالته اليوم " رد علي وهو مب متفيج : " الله يغربلك اليوم كله بيضيع عليه من اتصبحت بصوتك , اخر مره تصبحت بصوتك دعمت قطوتين وكمن بعوضه " ضحك خالد : " هههههه حتى البعوض ما ودرته بحاله , زين يالله قم قم اتسبح بمر عليك بعد نص ساعه اوكي ؟؟ " رد علي : " زييين الله يغربلك بقوم بس تراك بتعزمني على عصير البارحه اللي طيرته علي " قاله خالد : " انته قم اتسبح وخلص ويصير خير عقب الين أمر عليك " سكر خالد السماعه وهو يتذكر البنيه اللي شافها البارحه في المستشفى والا والدته داخله عليه الغرفه :" هاه خلود وين تبا فاز من الصبح والا من عقب صلاة الفجر ما رقدت ؟؟؟ " قال خالد وهو مستانس :" اتصدقين من البارحه ما رقدت , يالس أفكر في اللحظه اللي بتصيرين فيها يدوه " ردت امه وهو تضحك : " وييييين انا استوي يدوه , الا دام عيالي انته و حمود تراه ما منكم فايده , وبعدين انا بنت عشرين وين استوي يدوه ؟؟ " ضحك خالد وقالها : " يامي ما تفهمين انتي , انا ناوي اعرس " ردت الام بوناسه : " الساعه المباركه , منوه تبا بنت قوم بوشامخ والا ,,,, " قاطعها خالد وهو يضحك : " لا اماه ها العرس ايامكم انتوا , انا عندي عروسي و بغيت أشاورج بها , تعرفين رشود ربيعي انتي والا لا ؟؟؟ " قالت الام : " هيه جيه ما اعرفه ولد شيخه هو والا لا ؟؟ لا يكون تبا من خواته ؟؟؟ قال خالد بابتسامه : " هيه الوالده , البارحه مسكين مسوي حادث ومرقد في المستشفى وكانت وياه اخته و شفتها يا امي وطيرت عقلي من مكانه , وشو رايج "" منوه من خواته , اليازيه و الا خلود " قالت الام , رد خالد : " ماشالله تعرفينهم ؟؟؟ لا انا ابا خلود شو رايج ؟؟؟؟ " قالت الام وهي مستانسه : " اتريا بخبر ابوك " ,,,,

في المستشفى وصلت الريم ويا اختها عايشه وسلموا على خلود وقالت خلود تعاتب الخوات: " ليش امتعبين عماركم وييتوا ؟ الحمدالله ما فينا شي وراشد طلعوه من العنايه مثل ما اتشوفين بس هذا كله اثر الحادث والضربه " ردت عايشه : " لا يا بوج شفناكم وارتحنا شلتنا ها الخبله من صباح الله خير وخلت الدريول يطير ***ا الين اهنا , والحمدالله ما فيكم الا العافيه , والله يقوم الكم راشد بالسلامه " ردت خلود : " الله يسلمج انشالله , ما قلتوا لي شو اخبار الكليه ؟؟ " ردت ريم : " يالله والله تصدقين يا خلود مالها طعم من دونج , وايد مفتقدينج , وانشالله التيرم الياي بتردين والا بتمين موقفه ؟؟؟ " ضحكت خلود : " لا برد انشالله , هالسنه عشان العلاج بس اخرني والا كنت بكمل وشفت انه فاتني وايد ما حبيت استمر تعرفين السالفه انتي ريم " ردت ريم : " هيه والله احيدج يوم يايه من ….. " "السلام عليكم "" قاطع صوت علي سوالفهم ودخل وهو يضحك عليهم وقال : " هييييييه حريم ما عندكم شغل من صباح الله خير حش وقراض في الناس ما تشبعون انتوا ؟؟؟ " قالت عايشه بصوت خفيف : " هذا منوه داش علينا بشراع وميداف ؟؟؟ " اطالعها علي بطرف عينه : " صباح الخير , عويش والا انا غلطان ؟؟؟ " قالت عايشه : " هيه شو ياك , ما اتشوف ؟؟؟ " رد علي : " الله يغربلج , بلاج انتفختي ؟؟؟ شو تاكلين أفيال انتي ؟؟ " ردت عايشه : "هب هباك الرب , تشاهد قبل لا اسويلك فضيحه اهنا " قال علي بمصخره : " دخييييييييلج الا الفضايح , يسد ذاك اليوم شو سويتيها الله يغربلج ,خلود و ريموه شحالكم صبايا ؟؟؟ " ردت ريم : " منيحه , شو أخبارك واخبار خالتي ؟؟؟ " رد علي : " والله العيوز ما ادريبها يمكن وسط الع** والسرايا , الهوش اهم عننا تراه , وابا اقولها الصبح ولنها طايره ويا الدريول , صدق تغشن عندي ريال برا , اقرب خالد اقرب " رد خالد : " عنبوه سنه لطعتني برا , ما صارت غشوة حريم هاي , السلام عليكم " ردن البنات وعليك السلام الا ريم خافت وبين عليها خوف ولاحظته عايشه وخلود , بس الشباب لا , وقف خالد عند راس راشد وقال : " الله يقومك بالسلامه يا بو موزه , شو تبا السرعه الله يهديك " قاله علي وهو يضحك : " شو انته ما تفهم يقولك واحد لف عليهم , شو اتحراه شراتك ما يدبر السواقه , حد يدعم الرصيف بموتر يديد ؟؟ " رد عليه خالد وهو مستحي : " ياخي عن الفضايح انته , قم خل البنات ياخذن راحتهن وعازمنك على عصير وبنكمل سالفة البارحه بعد والريوق على احسابك شو رايك ؟؟ " رد علي وهو يبا يطلع اللي في مخابيه : " دخيلك ما عندي قرش الراتب ما نزل بسير البنك وعقب يلسنا في الكوفي شوب وبنسمع سوالفك كلها " ضحكوا وهم طالعين واستأذنوا من البنات …

" شو ياج قمتي تاكلين اظفورج وايديج ريمانه ؟؟ " قالت عايشه , ردت الريم وهي مو مصدقه : " تشوفين هذا اللي ويا علي ؟؟؟ " ردت عايشه : " هيه هذا الحلو ؟؟؟ " قالت ريم : " لا مب على سالفة انه حلو بلاج انتي هذا اللي قلت لج السالفه صارت لي وياه من زمان " قالت خلود وهي توها تسكر الباب : " اي سالفه ؟؟؟ "

في الكوفي شوب قال علي حق خالد : " هاه كمل السالفه مالك ذليتنا تراك من البارحه وانا متحرقص ابا اعرف شو هيه " رد خالد وهو يشرب الكوفي: "اسمعها يا خوك :

البنت اللي كلمتني كانت صدق طيبه وصدق حبيتها من قلبي وما قدرت اصارحها باللي صار المهم اتصلت بي في الليل : " هلا خالد , اشحالك " رد خالد ابرود : " الحمدالله بنعمه وعافيه " ردت البنيه : بلاك جيه بارد ؟؟ " رد خالد بصوت مثل الثلج : " مابلاني شي انتي شو ملاحظه شي علي ؟؟ " ردت بصوتها الناعم : " لا بس مو مثل العاده حبيبي , وانا عندي لك سالفه , ما أدري بس اعتقد بتزعلك " رد خالد ببروده : انج هب البنيه اللي عرفتج واللي ركضت وراج هاذاك اليوم ؟؟؟ أدري اذا هيه السالفه , وخليتيني اكبر لعبه ومضحكه !! " سكتت البنيه وكانه خالد صدمها بكلامه ورد خالد يقول : " وينج يا سراقة القلوب ؟؟ هاي الحركات هب علي انا , تسكتين وتسوين عمرج بريئه , أكلمج انا تراني " ردت وهي تصيح : والله اني كنت ناويه اقولك اليوم يا خالد , بس ما عطيتني فرصه , ما مداني اكلمك والا انته ببرودك هذا فاجأتني " رد خالد ببروده الثلجي : " أقولج الأفلام الهنديه هاي خليها على صوب , ابا اعرف بس ليش سويتي جيه ؟؟؟ انتي شفتيني والا شي وانعجبتي فيني والا كنت لعبه في ايديج انتي وريم الحديقه العامه ؟؟؟ " صاحت بزياده وهي تقول : " صدقني هذا الشي الوحيد اللي صار غلط بيني وبينك واتمنى من كل قلبي انك اتسامحني " رد خالد بضيق : أسامحج ؟؟؟ أسامحج على شوه ؟؟؟ على اللي سويتيه فيني والكذب ؟؟؟ هذا من اولها جيه الله يعين عقب شو بيستوي , ان اقولج شي كل واحد في طريقه , وما ابا تذكريني ولا اذكرج الا بكل خير " قالت له بصياح يقطع القلوب : " مب هذا اللي كنت اباك تسامحني عليه , اباك اتسامحني عشان انته اول انسان احبه , وأكلمه في التليفون واسمحلي على الجرأه وياك " وصكت الخط , يلس خالد بينه وبيننفسه يفكر , ما مداه الا صاح تيليفونه مره ثانيه , : " الووووو خير ؟؟؟ " ردت عليه الريم : " خير ؟؟؟ ما تبا تكلمني ؟؟؟ رد خالد ورد مثل ما كان واتنهد من قلبه وهو يقول : " لا يا ريم ليش ما ابا اكلمج ما انتي اللي طلعتيني من اللعبه اللي صارت , وتوني هديت عليها , وقلت الها انتي في طريق وانا في طريق شو رايج فيني ؟؟ " قل الكلمه الاخيره وهو يضحك ردت عليه الريم : " والله انك أهبل , ليش ما كان الاحسن تستفيد من بنتين ؟؟؟ " استغرب خالد وقال : " بنتين ؟؟ كيف قولي لي وانتوا ربع ؟؟ " ردت بقرف : " تخبي علي وتخبي عليها , وكنت بتلعب على الحبلين , اتوقعها منكم يالشباب " دارت الدنيا قدام خالد , وتذكر الانسانه اللي كان يكلمها , كانت مثال للبساطه والرقه , وكانت مثال للادب مب مثل هذي الحيه الخبيثه اللي تبا تفتح له طريق هو بعيد عنه ,,,

" وعقب شو استوى من بينكم " قالت خلود , وردت عليها الريم وعايشه تسمع : "انا يوم كلمته ما قصدت انه بيسوي جيه مثل الشباب بس ما كنت اعرف ارمس ويا شباب , وسمعت ربيعاتي يخبرني عن المشاكل اللي يسونها , وحبيت وبكل صراحه انتقم من كل الشباب " ردت عايشه هاي المره : " ليش ؟؟؟ شو سوو فيج ؟؟ بديتي بهذا الانسان انتي وربيعتج وخبلتو به وبقلبه وعقب شو استفدتوا من هذا كله ؟؟؟ " ردت ريم بنرفزه : " عايشه انتي اتزوجتي عن حب , ليش اتطلقتي ؟؟؟ وين وعوده هالانسان , وين حبه لج اللي عمره ما راح يتغير ؟؟؟ ما فكرتي ؟؟ " ردت عايشه والدمعه في عينها : " حرام عليج , نحنا اتطلقنا وبعدنا احباب اهله ما كانوا راضين علي ونحنا مثل ما تذكرين عايشين وياهم , وانا بكل صراحه ما قدرت اتحملهم اكثر ,,, خلاص صح احبه بس مب لدرجة انهم يهينوني , انا انسانه ولي مشاعر " ردت ريم بضحكه : " هيه , هالرمسه قوليها حق اميه وابويه , مب حقي انا , انا عارفه ليش كل هذا استوى , خلى اهله ينغصون عليج عيشتج عسب يفتك منج , بعدني اذكر كيف كانت حالتج يوم راده البيت , منهاره بمعنى الكلمه يا عويش " طاحت دموع عايشه وردت : " حرام اللي تسوينه وصدقيني , كل اللي تسوينه انا مشيت فيه , بس مع انسان فهمني وفهمته وحبني وحبيته والحمدالله تزوجنا ما صار شي للحرام من بينا يا ريم اما انتي لا كل يوم حبيب يديد , دخيلج لا تخلطين افكارج في بعضها " قالت خلود : " خلونا من السالفه هاي الحين , وكملي الريم نبا نعرف اللي صار "

" تذكر يوم كنت اقولك تعرفت على ***يه علوي قبل لا اسير بريطانيا ؟؟" قال خالد ورد عليه علي وهو يحط قلاص العصير على الطاوله : " هيه ذليتنا ذيج الايام والحين تيليفوناتك ما تصخ يا علها اتصالات ما ترحمك بالفواتير " ضحك خالد : " هههههه والله صدق من ها الناحيه , صدق بتخبرك منوه اللي كانوا عند راشد ذيج الساعه من غير ال ال الخطيبه " قال علي وهو يطالع خالد : " خطيبه ؟؟ اي خطيبه هاي ؟؟ " قاله خالد : " اليوم كلمت العيوز وقالت خير وكلمت الشيبه و قال لي ابشر ياك العون وبيتريون بو موزه يظهر من المستشفى وبنسير نخطبها كان لنا نصيب " ضرب علي جبهته بايده وقال : " خلود ؟؟؟ تبا اخت راشد ؟؟ شو هالكلام اليديد , ومن متى الحب ها ؟؟ والله انك صدق هب صاحي " قاله خالد : " ما جاوبتني منوه هاذيلاك اللي وياه ؟؟ " رد علي وهو يضحك : " ياخي هذيلا بنات جيرانا ومتربيين ويانا وحسبة خواتي , ما عندهم اخوان وحاسبيني اخوهم العود " قاله خالد: " ياخي ما ادري وين متشاوف ويا وحده منهم , زين عيل باكملك سالفتيه هاي عقب سالفة الحب الحقيقي اللي لقيته !!"

قالت الريم لخالد : " هاه وين على الله , وين ساير " رد خالد بضيق : " طالع بشتري اغراض للسفر , وين يعني بسير ؟؟؟ " قالت الريم : " أقولك بتسير بريطانيا وبتخليني انا اهنيه ؟؟؟ والله صدق ما تستحي على ويهك , وانا اذا بغيت شي من السوق والا من المطعم منوه بييب لي اياه ؟؟؟ " رد خالد بضيق : " ليكون انا ولدتج ونسيتج ؟؟؟ شو بلاج ريم ؟؟ ليش جيه انتي ؟؟ حببتيني في انسانه غيرج , وعقب طلعتي لي انتي ؟؟؟ " ردت ريم ببرود : " والله صدقني اني انقذتك من انسانه لا هي من مستواك ولا هي من شكلك , خالد انته حبيت الريم اللي في الحديقه ما حبيت البنيه اللي ترمس وياك , ليش الحين تبا البنيه اللي كانت ترمسك ؟؟ " رد خالد والدمعه تضارب عيونه : " انا ربطت بين شكلج الخارجي , وبين روحج والرمسه وياج في التيليفون , للاسف شكل ملائكه بقلب شياطين " ردت الريم بحزن : " الله يسامحك يا خالد , الحين كملنا أكثر من 6 اشهور على نفس الموال كل يوم , ما نسيتها انته هاي المخلوقه ؟؟ " رد خالد والدمعه نزلت من عينه بدون مقاومه , لا والله ما قدرت انساها خبريني منو هيه ؟؟ بس قولي لي منوه هاي البنيه " ردت الريم بحزن : " يعني بعدها في بالك أكثر مني ؟؟ " رد خالد : " لا , صدقيني لا , بس بغيت اعرف منوه هيه ولو انه شي يجرحج خلاص لا تقولين " ردت ريم : " هيه يجرحني وايد واكثر من ما تتصور بعد , المهم انا بسير بيت ناس نعرفهم متوفيه اختهم من كم يوم , وبسير اعزيهم " رد خالد : " ما دايم غير وجه الله , خلاص حبيبتي سيري وخلصي واتصلي بي انزين " ردت الريم : " انشالله "

سافر خالد بريطانيا وأول ما وصل اتصل بحبيبته : " وردت : " ألووو " قال خالد : " هلا عمري اشحالج , توني فديتج واصل وبعدني في المطار " قالت له الريم : " منوه انته ؟؟ " رد خالد : " شو بلاج ريموه انا خالد , ما اسرع نسيتي " قالت ريم : " هييييييييه , خالد على بالي , محمد , زين متى وصلت ؟؟ " رد خالد : " منوه محمد هذا ؟؟ " ردت : " هذا حبيبي اليديد الين ما ترد البلاد يا … ياعمري " حرج خالد وصارخ والناس تطالعه : " منوه ؟؟؟ وتقولينها بعد بكل برود اعصاب ؟؟؟ ما تستحين ؟؟"
ردت الريم: " شوي شوي لا ينط لك عرق , بس حبيت اعلمك انه بنات الناس هب لعبه عندكم , وعلى العموم انسى رقمي وانسى كل اللي كان بيننا " رد خالد وهو يصيح : " عمري ما راح اخليكم في حالكم , انا عمري ما قصرت عليج بشي وانتي كنتي تذليني مذله يا ريموه , والله بنتقم منج ومن كل البنات بتشوفين ,,,, " ضحكت ريم : " هدي شوي , هذي سنة الحياه حبيبي , وكلها ألم وفراق ومثل ما لعبت عليك بلعب على غيرك ودامك بعيد ما تقدر تسوي شي , المهم يالله حمووووووودي يتريا على الخط باي ,,, "

" خلود بلاج ؟؟ " قالت ريم , ردت خلود : " لا ماشي سرحت واتذكرت السالفه يا ريم تعرفين منو اللي كانت ترمس ويا خالد ؟؟ " ردت ريم : " هيه اختج اليازيه اللي كانت ترمس انا عاطتنها الرقم وقلت الها طفري به " ردت خلود وهي تصيح : " اليازيه عطتني الرقم وقالت اتصلي به وفكيني من حشرة الريم , وانا كنت اكلمه طول هذيج الفتره الين ماحبيته و قطع كل العلاقة اللي بينا ,,, " " أي علاقه واي سالفه ؟؟؟ " قال راشد بصوت ضعيف وهو في فراشه وكمل : " شو السالفه وين نحن وشو صار " قامت خلود وهي تعدل الفراش له : " حمدالله على سلامتك يا راشد , وما تشوف شر من سويعه راحوا خالد و علي كانوا اهنيه وقالوا بيردون عقب " اندق الباب وسمعوا صوت يقول : " هوووووووووووووود , السلام عليكم , بعدكن اهنيه انتن ما وراكن بيت تخمنه وتطبخن ؟؟؟ " قال علي وهو يضحك , ردت عايشه : " هب هباك الرب , وشو فايدة البشاكير والطبابيخ , ياخذون رواتبهم ونسير نحن نخم ونطبخ عنهم " قال علي : " انتي ام ألف السان بتردين البيت وبخلي امج تخليج تطبخين , هااااااااااااه !! بو موزه , حمدالله على السلامه متى نشيت , و شحالك الغالي ؟؟؟ يا خالد تعال نش الريال نش " دخل خالد و ابتعدت خلود وهي تمسح دموعها وقال : " السلام عليكم اجر وعافيه يا بو موزه , وما تشوف شر انشالله " رد راشد بصوته الضعيف : " الشر يعداك , بتخبركم شو صار تراه راسي بينقع من الوجع " ردت خلود : " البارحه ما اتحيده هاذاك الخبله راعي النيسان اللي لف علينا ودعمنا من قدام السياره " اتنبه راشد من رقدته وصرخ و قال : " وين موزوه ؟؟؟ وين عيالي ؟؟؟ وين حرمتي ليكون شي استوابهم ؟؟؟ " قال علي : " ما ابهم الا العافيه ياخويه " موجودين بس في البيت تعرف يبون يريحون شوي " "بشووووفهم دخيلكم هاتوهم لي " قال راشد , وردت اخته: " خلاص بسير ايبهم من البيت وبرد , عطني علي سيارتك " قال علي : " انا ياي ويا خالد السبال شلي سيارته والا خليني انا ايبهم " قال خالد : " هالمفتاح راشد " ردت خلود : " خلاص روحو انتو هاتوهم وبرد البيت انا ويا ريم وعايشه " التفت خالد بسرعه صوب البنات وهو يردد : " الريم " انتبهن له البنات ,وقالت عايشه بسرعه : " من رخصتكم يا جماعه وما تشوف شر يا رشد , ورانا درب للبيت " صاح تيليفون الريم في الشنطه و فتحتها وشافت الرقم , رقم خالد !!

وخالد يشوفها بنظرة حقد وهو طالع من الباب وتبعنه البنات كلهن ونادته الريم : " خالد , اتريا شوي , رد خالد بكره : " خير " ردت الريم والدموع مغطيه وقايتها : " ادري انك كرهتني بس حبيت اقولك شي اتمنى انه يصلح غلطتي , هاي هي البنيه اللي كنت ترمس وياها قدامك " و أشرت له بأصابعها صوب خلود البنت اللي دق قلبه بها بغير ما يشوفها !! واللي كان يبا يتزوجها وهو ما يعرف انها هي هذي البنيه اللي كانت الحب الاولي له ,,,

عقب سنه ونص قال خالد : " أقولج شو رايج انسمي بنتنا ريم ؟؟؟ " قالت خلود : " لا والله , والا انها بعدها في قلبك ؟؟؟ سميها اليازيه هي اللي عطتني رقمك " قال خالد : " لا اليازيه كانت بتكون مكانج الحين اما الريم , خليها تعيش ويا ريلها في السلع ابرك الها ,وتكون ذكراها ويانا , صدق اختها عايشه في اي شهر الحين ؟؟؟ " ردت وهي تبا تتذكر : " والله اعتقد انها السابع ليش ما سألت حبيبك علي ؟؟ " ضحك خالد وقال : " ها الاهبل من عرس ما انشوفه كله ويا المدام الا كان طلعناه غصب , وعقب حب خشوم , بسير اتخبر الدكتور متى بييبون البنيه الشيبه والعيوز ياين من دبي طايرين عسب يشوفونها ومتى بيظهرونج البيت بلاج تراه ما يسوا ,,,

ردت عليه خلود : " اتصدق خاطري اسير الحديقه العامه , ابا اتمشى اهناك عقب ما يظهروني من المستشفى" رد خالد : " دخيلج انا حالف ما أطبها بتسيرين سيري روحج " وين تباها اتسير روحها , وهي جذا حالتها " قال علي , رد خالد وهو يضحك : " هلا , والله انك ولد حلال تونا مقطعينك انا والمدام , وما واحالك لنك ياي " رد علي : " يا خوك الحرمه بيولدونها بقيصريه من السابع وقلت امر عليكم دامها في غرفة العمليات " رد خالد : " بالبركه انشالله عرفتو ولد والا بنت ياينكم ؟؟ " رد علي : " سوينا ياخوك ويايتنا ***يه , ما يندرا شو انسميها " صاح تيليفونه في هاي اللحظه والا نسيبه اخو ريل الريم قال علي , غريبه هذا شو يبا , ورد عليه , قال خالد لخلود : " شو انسميها الحين ؟؟ " ردت خلود : " ما أدري بك بس صدقني ما اباك تسميها الريم عن تطلع مثلها " قاطعهم علي وهو يبا يصيح : " لا حول ولا قوة الا بالله , ريم وريلها اتوفو في حادث سياره وهم ياين العين !! الله يعين عايشه والريم الصغيره ويقومهم بالسلامه " قال خالد وهو يصيح : " كيف ؟؟؟ لا قول كلام غير هذا ؟؟؟ " قاله علي : " والله انها رمسة اخوه شو بيبتلي عليه ؟؟ " قالت خلود وهي اتصيح من الصدمه : " خالد !! سير هات ريم الصغيره من الدكتور وخلنا انروح انعزي اهلهم " ,,,

وعاشت ريم ذكرى في حياة خالد وعلي حتى بعد ما ماتت , خالد اللي في يوم من الايام حبها لشكلها وماحبها في مضمونها كانسانه وكانت السبب انه يختار الروح قبل الشكل ويعيش متهني مع خلود , و علي اللي كانت بالنسبه له أكثر من اخت واكثر من مجرد بنت جيران , وكانت اخت زوجته اللي لقى وايد اشياء تجمعهم مع بعض وعرفت ريم هالشي وربطت بينهم ,,,

النهايه

==============
منقووووووول

تحياتي لكم