تكملة الجزء الاول :
رد خالد بصوت عالي وهو مو مصدق : " انتي ؟؟؟؟؟؟؟؟؟؟؟؟؟؟ "
ردت عليه صاحبة الصوت الناعم : " شو نسيتني خالد والا ؟؟ " رد خالد وهو متضايق : " لا , كيف أنساج , كيف أنساج يا ريموه مب انتي اللي دمرتي حياتي مب انتي اللي بيعتيني أغلى ناسي ؟؟ " قالت ريم بصوت حزين : " حرام عليك انا الحين اللي دمرت حياتك وبيعتك أغلى ناسك ؟؟ أنا اللي أنقذتك من أكبر لعبه انلعبتك عليك في عمرك كله !! أنا اللي وقفت لك مثل الحبيبه والأخت والصديقه ووقفت قدام حياتك اللي كانت بتنتهي ب ,,, " قاطعها خالد بعصبيه : " أرجوج ريم انا اللي صار لي منج ما راح أنساه طول عمري وطول حياتي أدعي عليج وعلى الساعه اللي عرفتج فيها وسمحيلي الحين , وراياه شغل باجر الصبح وداعة الله " وسكر السماعه بقوه ,,,
تمت ريم ماسكه السماعه وهي مو مصدقه قالت الها اختها عايشه وهي تبي تتمصخر عليها : " هاه ؟؟ صك بويهج ؟؟ تستاهلين قلت لج لا تتصلين فيه ما سمعتي الرمسه تستاهلين وهذا يزاج وأقل من يزاج بعد " نزلت دمعه على خد ريم وردت بصوت مبحوح : " حرام اللي صاير عويش , أنا طلعته من أكبر لعبه في حياته واخرتها هذا جزاي ؟؟؟ " قالت الها عايشه برحمه ولطف : " خلاص ريمانه , شلي هذا المخلوق من راسج وشلي الافكار اللي تلعب في مخج انتي ألف واحد غيره يتمناج , كامله والكامل وبه الله سبحانه , بس انتي اصبري على الزواج ولا تستعيلين على ر**ج " صاحت ريم وهي تقول : " مب متخيله اللي صاير وياي , انا ما أستاهل اللي يصير لي ,,,
اتقلب خالد في فراشه وهو يطرد صورة ريم من خياله واتذكر كل اللي صار من بينهم وكل لحظه مرت عليهم , رقد ولا عرف كيف رقد وقام من النوم وهو مب عارف كيف قام اتخربطت حياته يوم سمع ها الصوت كيف كان لعبه في ايدين ناس ,,, نش من رقاده وهو يشل الصوت من راسه اتسبح وصلى الفجر في البيت واتزهب وراح ويا اربيعه علي المرور " اشوف محلو اليوم ؟؟مواعدني على الصبح شوه ؟؟ " قال ربيعه علي , ورد عليه خالد : " لا حول ولا قوه الا بالله اصبحنا وأصبح الملك لله , ياخي انته دومك متفيج ؟؟؟ ما كد زعلت ؟؟ ما كد شي عصب بك ؟؟ عافانا الله " ضحك علي وقال له :" ياخي ليش اعذب عمري بهموم , اضحك , شو شال من الدنيا ؟؟ ماشي غير أعمالك وبعدين (( تبسمك في وجه أخيك صدقه )) ما بالك بضحكه في ويه اخيك ؟؟؟ " ضحك خالد غصبا عنه وقال :" ياخي انته كله اتياحد ؟؟ ما تغلط ؟؟ حسبي الله على بليسك " خالد على كثر ما يطفر به علي الا انه كان يحبه ويعزه أكثر من اخوانه حتى , بس عمره ما فتح له قلبه وهمومه , وكان ينسى بلاويه ومشاكله ويا علي ,,,
في المرور طلع خالد ذاك الرقم الزين وحطه على سيارته اليديده ويابها البيت وراواها أهله وكلهم باركوله عليها , وياب الذبايح وعزم ربعه على العشا عسب كلهم يحضرون ,يلسوا الشباب يسولفون ويا خالد اللي يسأله بكم خذت السياره واللي يقوله وين أمنتها وجيه الين قال علي ربيع خالد : " خلود !! وين رشود ؟؟ ما عزمته ؟؟؟ " رد خالد وهو يحاول يتذكر : " والله ظنتي اني كلمته اليوم وقال انه بيي , ما أدريبه ليش بطا واتحير , بدق له بشوفه وين " رد عليه علي : " انته ذيج الساعه همك كرشتك تمزرها مب متفيج لا حق رشود ولا غيره حتى اهلك بتنساهم وقت الاكل " رد خالد وهو يضحك : " اصبر ياخي صاح تيليفونه هذوه " قال خالد : " ألوووو " رد عليه صوت غريب " الوووو " بنبرة حزن , رد خالد وهو يبا يبلع اللقمه : " مرحبا اختي هذا تيليفون راشد ؟؟ " ردت البنيه : " أي راشد بغيت اخويه ؟؟ " رد عليها خالد : " راشد عبدالله ؟؟ " قالت البنيه : " هيه نعم تيليفونه بس راشد مسوي حادث ومرقد في العنايه في المستشفى " تخربط خالد ونسى كل شي وصرخ : " هااااه ؟؟ أي مستشفى ؟؟؟ " سكتوا الشباب اللي وياه في المجلس كلهم ويلسوا يتصوخون وهو يقول " اوكي اوكي الحين يايين وداعة الله " …
في المستشفى وصل خالد ويا ربعه اهناك وسألوا عن ربيعهم راشد وقالو لهم : " حالته حرجه ومرقد في العنايه المركزه و حالته خطيره جدا اصابات ونزيف داخلي حاد " "منوه كان وياه ؟؟ " سأل علي وردت عليه السيستر : " وياه بنته وحرمته واخته وكلهم الحمدالله بخير وعافيه اصابات بسيطه بس وطلعناهم , الحين موجودين في الاستقبال " راح خالد وعلي وتموا الشباب عند راشد برا , " السلام عليكم " قال علي وردوا عليه " وعليكم السلام هلا علي اشحالك " رد علي " بصحه وعافيه الله يسلمج , سلامات شو استوى عليكم ؟؟ " ردت حرمة راشد " اخت على " : " والله لف علينا واحد الله ياخذه ودعم سيارتنا من قدام وافترت سيارتنا ودعمت الحدايد اللي في الشارع و السياره صكت على راشد واتعور وايد الله يقومه بالسلامه ,,, " المهم خالد في ها الوقت كان يطالع اخت راشد وهو مستغرب كان راشد ابيض وحلو ماشالله عليه بس اخته سمرا وشكلها مو حلوه وايد بس رقيقه بشكل غير طبيعي , جذبت خالد بشكل كبير برقتها , قال علي لاخت راشد : " (( خلود )) اشحالج ؟؟ عسى ما اتعورتي ؟؟ " انصدم خالد وهو مبحلق عيونه من الاسم اللي بعده في مخه " الحمدالله راشد انا بألف صحه بس رضوض خفيفه " ما اتحمل خالد وطلع من الاستقبال وهو مصدوم ,,,
طلع وراه علي يقوله : " خالد ؟؟ وين تبا ؟؟ " قاله خالد وهو متنرفز : " عطني سيجاره علي " علي اطالعه وهو مستغرب : " سيجاره ؟ احيدك مودر شو ياك ؟؟ متأثر وايد شو ؟؟ " قاله خالد بضيق صدر : " ياخي فكنا من حشرتك وعطني السيجاره مب متفيق للحشره " عطاه علي السيجاره وهو يطالعه , قاله خالد عقب ما ولع السيجاره وهو متنرفز : " أقولك علوي منو هاي اللي ويا رضيعتك ؟؟؟ " قاله علي وهو يستهبل : " البنيه الصغيره , هاي بنت اختي مواز فديتها هاي اللي ايبها وياي يوم ابا اسير كارفور والا المول واشتر … " قاطعه خالد بضيق : " علوي عن الاستهبال والحركات هاي اوكي , أنا أطري البنيه الثانيه , العوده " قاله علي وهو يضحك : " ادري انك تطري العوده بس أستهبل عليك ياخويه هذي الله يطول لي بعمرك اخت ابو مواز رشود الصغيره , و شكلك ناوي على نيه يا بوالوليد " رد خالد و قال له ابا اطلع من هالمكان وابا ارمسك عن سالفه ذبحتني من سنين واشوف عمري بقولك ايهاها " قاله علي : " ما طلبت يا بويه اليوم تعال عند النقفه الساعه 11:00 وبتلاقى وياك وبنسمع سالفتك ,,,
وصل خالد النقفه على الساعه 11:00 بالضبط وحصل ربيعه علي يالس اهناك يترياه ومن شافه يلس ايشر له , المهم عقب ما ارتاح خالد ويلس وياه قاله علي : " شو سالفتك انته اللي من كم سنه حتى انا ما خبرتنيه عنها ؟؟ " قاله خالد : " اسمع يا خوك " وخبره كيف رقم البنيه في الحديقه والسالفه اللي صارت :
صاح تيليفون غرفة خالد رد عليه بلهفه وهو يتريا : " ألوووووووو " رد عليه صوت ناعم صحيح بس غريب : "هلا خالد , اشحالك ؟؟؟ " رد وهو يبا يتذكر : " بخير وعافيه بس منوه وياي ؟؟؟ " رد عليه الصوت الناعم : " انا فراولة الحديقه العامه نسيتني شوه ؟؟؟ " رد خالد وهو مستغرب : " بلاه صوتج متغير جيه ؟؟ " قالت له بنبره الواثقه : " انا صدق الفراوله اللي رقمتها وعطيتها رقمك مب هذيج الانسانه اللي قصت عليك وقالت لك كلام كذب عقب ما سرقت رقمك مني " قال خالد وهو معصب : " يابوي عن الخريط والسوالف اللي مالها داعي منوه انتي ؟؟؟ " ردت عليه البنيه : " انا البنت اللي شفتني في الحديقه مب اللي ترمس وياك كل يوم واللي بنت وياك احلام وقصور وصلت لدرجة انك تبا تتزوجها " انصدم خالد زياده وقالها : " انتي منووووووه للمره الاخيره والا بسكر الخط ؟؟ " جاوبته بكل ثقه : انا الريم اللي شفتني في الحديقه , واللي تكلمك وحده خاينه من اربيعاتي وحبت تاخذك مني يالله باي " وصكت الخط في ويهي يا علي
رد علي وهو مو مصدق : " لا حول يا خويه ابرد على فوادك بعصير ؟؟؟ " قاله خالد : " والله تسوي خير يا خويه " قاله علي :" بس على احسابك تراه " ضحك خالد وقاله : " تراني مفتقر الله يغربلك عزيمه اليوم وسياره والدنيا خلها عليك المره " ضحك علي وقاله : " هيه جيه اباك انسا الهم كله , انزين يعني السالفه كلها انها سوت نذاله وشلت رقمك عن الريم ويلست توهمك انها الريم وخبلتك عليها صح ؟؟ طالعه خالد وهو شارد : " السالفه غير عن جيه يا علوي ومعقده وايد بس اتأخرنا اليوم وباجر اكلمك وأقولك اللي صار كله " قاله علي : " والعصير ؟؟ "
وانشالله الجزء الثالث و الاخير عن قريب وياكم ,,,,
================
منقووووووول
تحياتي لكم