صدق المثل اللي قال: لي ما يعرفك ما يثمنك

بصراحة في أمثال تمر بحياتي احفظها بس ما أعيش احداثها !!

صار لي موقف قبل ما أطلع اجازتي السنوية وكان كالتالي كان اخر يوم اداومه وكنت مستانسه اني بعد عناء باخذ اجازة طويلة، رغم انهم ما عطوني قد الايام اللي طلبتها بس الجود بالموجود

الله يسلمكم ويسلم غاليكم كنت كأي موظف يحب شغله حابة اخلص كل التزاماتي عشان اللي

بيكون مكاني ما يتلعوز وما يعرف شو اللي له وشو اللي عليه .. ومن فلاحتي ما خليت حد إلا وقلتله إني اول وحدة طالعة اجازة وكل شخص يجوفني اشتغل واشد همتي يطالعني ويقول :

اشعليج اخر يوم .. اكيد مستانسة وأنا وحليلي أرد واقول اكيد .. المهم صار الوقت وخلص الدوام

شو قلت في خاطري: باجيلي كمن معاملة و بخلصها وبعدين بتوكل .. وتميت الله يسلمكم ساعتين

من بعد ما خلص الدوام .. المهم طلعت ولا جني أزرق موجود .. مشيت وتميت اطالع المكتب

والمبنى والباركنات واقول: اشوفكم على خير بعد شهر.. ييت حذال السيارة وكانت في قطوة

ما تلقى إلا سيارتي تنسدح تحتها مادري يمكن لونها ولا شكلها ولا شي ما في نفس يعقوب ..

ورغت القطوة.. وسارت لحال سبيلها .. المهم ييت أبا اشغل السيارة طبت ساكته

ياعرب الله شو السالفة .. اصلا في حد عشان اسأله وانا من بوني طمة ما عرف شي في

السيايير الا شغلي ودقي سلف و بركني وصبي بترول وغسلي السيارة وبس .. ومن ذكائي ما

فكرت في اختراع اسمه موبايل .. لا وازيدكم من الشعر بيت دوامي مكان بعيد لا حس

ولا خبر .. المهم ما لقيت حد .. قلت يالله بكلم الحرس يمكن يساعدوني ويفهموني شو السالفة ..

لا والقهر تحريت السيارة يمكن تنفجر وهديتها مفتوحة وسرت .. المهم يمين يسار .. مافي فايدة..

قلت شكلي بودر رفيقة دربي وبروح بروحي .. وإذا ببصيص أمل أراه قادما نحوي .. شفت سيارة

موظف قلت يالله بيساعد زميلته .. وياللحظ طلع واحد من الأهل يدوام معاي ,, وخمنوا هذا الريال

كنت اعتبره انسان لا مبالي ما يساعد حد انسان متكبر يعني كنت ماخذه فكرة مو طيبة عنه..

المسكين شافني وساعدني وتم يحاول في السيارة اوبس نسيت اقولكم طلعت المشكلة ..

ان بطارية السيارة خلصت وانا اشدراني جي كنت ميكانيكية عشان كل واحد يلومني،،

المهم جان يقولي الله يذكره بالخير اللي من اهلي كلمت الأهل!! جنه حد صب ماي بارد عويهي

وجان اتصل واخبرهم بالسالفة والمساكين يوو عقب شو يوم شاب ودوه الكتاب ..

المهم المذكور المسكين عدل سيارتي و تم وياي لين ما مشت العزيزة الغالية (سيارتي)

استخلص من هذا الموضوع ان نحن كبشر احيانا ياما نحكم بالغلط على ناس من دون

ما نعرفهم عدل،، وما نقدرهم واحيانا تلقانا نتجنبهم بدون اسباب، ومن ذيج الساعة قررت اني

ماحكم على الناس من الوهلة الأولى !!! بالع** اعطي كل ذي حق حقه ..

Just Me MANGO

Thur .. 8:18 PM

يعطيك العافيه مانجو

ويعطيج العافيه الغاليه …

تحياتي لج اختج ام زايد

مشكورين عزيزاتي

وتسلمين ..

شهيتيني بالهمبى

مشكوره على الموضوووع

صح كلامج لا نحكم على ناس سمعنا عن اطباعهم

جزاج الله خير

والحمد لله على سلامتج وسلامت سيارتج

ودمتي سالمه