اخواني و خواتي …
الانسان بطبعه كائن اجتماعي … و له أهل لو من بعيد أو جريب … فوايد من الاحيان توصلنا بطاقات الدعوة لعرس حد من الأهل او من الجيران او المعارف أو الربع … و في هالمناسبات الناس يعرفون الوالد و الوالدة الله يحفظهم أكثر عنا احنا البنات … لدرجة ان العرق الدساس يطلع فهالمناسبات .. يعني لو شافوني الحريم على طووول يسألون انتي بنت منو ؟؟ 
((هالاحساس لما الانسان يحس ان حد يقرب له )) اجاوبهم فعلى طوووول يسلمون و يسألون عن الاهل و الوالد والولدة ، حتى ساعات أقول لهم أنا بنت فلان (يدي الله يرحمه و يغفر له ) فعلى طووووول يعرفوني 
….الخ
زين عقب ما يسلمون و اسلم عليهم أسأل الوالد او الوالدة عنهم …ويخبروني : هذي بنت خال يدج و هذي اختها تقرب لبنت عمة يدتج و هذا حرمته تقرب لبنت خالة يدتج، و هذي بنت خال عمتج بالرضاعة >> عاد أنا ارووووح فيها 
… بإسم الله على مخي … شو بيفهوني عطوني مثال واضح يعني تقرب لكم شراة منو من العايلة سمّو لي حد يقرب لي شراة ما هي تقرب لكم عطوني مثال عسب أفهم …
زين مرة يلست ويا الوالد الله يحفظه و خالي و يدتي و يلس الوالد يعدد اصل شجرة العايلة و يلس يعدد (( أجدادي)) و عددهم و عرفنا أساميهم الله يرحمهم كلهم و يغفر لهم ,,, و وصل ليدي الثامن بوسنيده (راشد) و وقف ، قلت له كمّل، قال لي: هذا اللي أعرفه … و ما أعرف الباجيين … يعني اللي عقب يدي الثامن … و يلس يخبرنا عن اللي يعرفه عنهم … و الله السالفة طوووويلة و راسي عورني 
… و كل واحد فيهم شو اشتغل و وين سافر و شو سووا … راسي عورني … ما شاء الله عندنا حد يخبرنا عن أصل العايلة الكريمة … الله يحفظ لنا الوالد …
يلست أحاول أحفظ اللي يقربون لي و شو يقربون و الله شو يقربون لي بس اللي اعرفه يقربون لنا … شو نسوي مب مفروض نعرف شو يقربون عسب نعرف نوصلهم لأنهم أرحامنا ؟؟؟ 
أترك لكم التعليق 
بقلم أختكم
ورد الجــــوري …
فحق الأسرة على الجميع الإحترام والتقديروالصله فهي معلقه تحت عرش الرحمان فزيارتهم واحترامهم وتقديرهم من تقدير الوالدين جزاك المولى جنة ونهر عند مليك
مقتدر آمييييييييييييييين
بس سبحان الله ساعات تحسين ان فلانه تقرب لج حتى لوماتعرفين هالشي
ويأكد شكج الوالد او الوالدة
واكيد قلة الزيارة تقلل من معرفة الاهل لبعضهم البعض
ويمكن لهالسبب العيال مايعرفون اهلهم البعاد وايد
تسلمين اختي ورد الجوري على هالموضوع الطيب
والبركة في الوالد الله يحفظه لكم
امي ما عندها عمومه من وين طلعت .. والله اللي يقرب لها ولي ما يقرب يلصق بها ..
هذي امي لازم نحطها شيخة القبيله في الذيد …
لرجه ان الذيد كلهم عمومتي .. والحين وصلنا لجميرا .. عقبال ما نوصل لبوظبي والعين …
مادري امي لزقه توفيس كل من هل ودب لصق فيها ولا شو سر الجاذبيه مادل …
والاكشخ … يوم اي حد يسألني انتي بنت منوه ما قلهم درام بنت فلان لا .. درام بنت فلانه بنت فلان .. سيده يعرفوني …
واحيد ايام المدارس يسموني درام بنت فلانه … كشخه ..
نسيت اسم ابويه حتى فديته … بو علي " اسم ابويه سلطان هب حسن اع "
اممم انت عيل لو يتي سمعتي قصة عايلتنا اسمي بتتلخبطين والله شكثر أبويه الله يرحمه وعمي والعيايز خبرونا شجرة العايلة بس أبدا أنا وخواتي مانحفظها ويوم ني نقولها عاد تستوي الضرابة هاي تقول هذا يستوي ولد خالة أم بابا والثاني يقول شي والثالث يقول شي …
لين ما توفى بابا الله يرحمه … اختي العودة قالت لازم نرسم شجرة العايلة عشان نحرص ام نصلهم " برا " لابويه ،،، المهم **رنا عمي ورسمنا شجرة العايلة … أحينه صميناها من كثر مانقراها …
بس الصراحة شي حلو إن الواحد يعرف تاريخ عايلته ،،، أنصح الكل يسوي شجرة للعايلة خاصة لو كانت عايلته كبيرة
موضوع حلو !! ذكرتيني بأيام حلوة وذكرتيني بالوالد الله يرحمه
بس طلع عندي ولد بنت خالتي … عرفته بطريقه بس ماقدر اقولها هني .. احم اح << كلن يفسر ع كيفه ..
بس استغربت ان يقربلي … وتمت مليون الف علامة استفهام ع راسي ..
يوم كنت اشوفه دووووووم ما كنت ادري انه يقرب لي بس يو اختفى عرفت ..!! الحين ابا اشوفه عشان اتمعن فيه كخخخ
المشاركة الأصلية كتبت بواسطة المحب للخير فحق الأسرة على الجميع الإحترام والتقديروالصله فهي معلقه تحت عرش الرحمان فزيارتهم واحترامهم وتقديرهم من تقدير الوالدين جزاك المولى جنة ونهر عند مليك
مقتدر آمييييييييييييييين
العفو اخويه …
نعم الرحم معلقة بالعرش تقول من وصلني وصله الله و من قطعني قطعه الله … و وصلهم بر لأجدادنا و آباءنا و تأدية لحقهم و طاعة لربنا …
اللهم آمين و اياكم اخويه الكريم …
يزاك الله خير على المرور و بارك الرحمن فيك …
المشاركة الأصلية كتبت بواسطة الجويس بس سبحان الله ساعات تحسين ان فلانه تقرب لج حتى لوماتعرفين هالشي
ويأكد شكج الوالد او الوالدة
واكيد قلة الزيارة تقلل من معرفة الاهل لبعضهم البعض
ويمكن لهالسبب العيال مايعرفون اهلهم البعاد وايد
تسلمين اختي ورد الجوري على هالموضوع الطيب
والبركة في الوالد الله يحفظه لكم
شكلهم بيطلعون كلهم أهلي
عيل عن الاحساس بقول لج سالفة وحدة ويايه ايام الجامعة … ندرس في نفس القاعة و نفس المساق و تيلس بيني و بينها وحدة من الطالبات و لما أشوفها احسها مب غريبة عليه و حتى ملامحها شوي جريبة من ملامحي … و آآآآخر شي اكتشفت انها تقرب للوالد … و من عرفتها استوينا ربع
قلة الزيارات هذي سالفة لكل واحد ظروفه بس أضعف الايمان نوصلهم من فترة لفترة ثانية عسب ما نكون قاطعين … الله يعين
يزاج الله خير على المرور وبارك الله فيج
المشاركة الأصلية كتبت بواسطة درام الحب امي ما عندها عمومه من وين طلعت .. والله اللي يقرب لها ولي ما يقرب يلصق بها ..
هذي امي لازم نحطها شيخة القبيله في الذيد …
لرجه ان الذيد كلهم عمومتي .. والحين وصلنا لجميرا .. عقبال ما نوصل لبوظبي والعين …
مادري امي ل**ه توفيس كل من هل ودب لصق فيها ولا شو سر الجاذبيه مادل …
والاكشخ … يوم اي حد يسألني انتي بنت منوه ما قلهم درام بنت فلان لا .. درام بنت فلانه بنت فلان .. سيده يعرفوني …
واحيد ايام المدارس يسموني درام بنت فلانه … كشخه ..
نسيت اسم ابويه حتى فديته … بو علي " اسم ابويه سلطان هب حسن اع "
عادي انا اي وحدة اشوفها اقول لها خالوه .. عاد هي تعرفني لما تكون من الأهل تقول لي : عموه مب خالوه >> شو اسوي اتوهقت وياهم ما ادري منو تقرب من أهل ابويه و منو تقرب من أهل اميه …
عاد سافة امج الله يحفظها شراة سالفة ابويه … كل ربعه لا**ين فيه .. يقول لو سرت عرس و لا عزيمة اشوف الكل يالس حذالي … و يهدون ربعهم و يلسون عندي … ما شاء الله شعبية عنده و محد منا ماخذ شي من شعبيته … كلنا عاديين بالنسبة له 
درام بنت فلانة حرمة سلطان … الله يرحم الوالد و يغفر له و يحفظ لج الوالدة و يبلغها فيج … قولي آآآمين
يزاج الله خير على المرور و بارك الله فيج ..
هاي مشكلة هالزمن الواحد الوقت ولبه يكفيه عشان يزور اقرب اهله فما بالج بأهله البعاد ,,
بس سالفة رسم شجرة العائلة هاي عيبتني وياسلام لو تكون على ورق شراة أول ويسويها خطاط وتتورث لعيالنا عقبنا كشخة
ورد الجوري ,,, أنا مرة عرفوني على ولد عمة أخو يدي بالرضاعة خخخخخ الواحد يضيع
المشاركة الأصلية كتبت بواسطة الصغيرونة اممم انت عيل لو يتي سمعتي قصة عايلتنا اسمي بتتلخبطين والله شكثر أبويه الله يرحمه وعمي والعيايز خبرونا شجرة العايلة بس أبدا أنا وخواتي مانحفظها ويوم ني نقولها عاد تستوي الضرابة هاي تقول هذا يستوي ولد خالة أم بابا والثاني يقول شي والثالث يقول شي …
لين ما توفى بابا الله يرحمه … اختي العودة قالت لازم نرسم شجرة العايلة عشان نحرص ام نصلهم " برا " لابويه ،،، المهم **رنا عمي ورسمنا شجرة العايلة … أحينه صميناها من كثر مانقراها …
بس الصراحة شي حلو إن الواحد يعرف تاريخ عايلته ،،، أنصح الكل يسوي شجرة للعايلة خاصة لو كانت عايلته كبيرة
موضوع حلو !! ذكرتيني بأيام حلوة وذكرتيني بالوالد الله يرحمه
الله يرحم الوالد و يغفر له و ينور له قبره … آمين …
عاد يكفي انا بروحي حالتي حالة مب رايمة احفظ شجرة العايلة لما احفظ شجرتنا بعرف شجرتكم >> حلوة هذي
بس فكرة حلوة أنكم تكتبون شجرة العايلة عسب تعرفونهم زين … عاد انا افكر نرسم شجرة العايلة بيكون الرسم أسهل .. و يبالي يلسة خاصة ويا الوالد الله يحفظه عسب ايلس ارسم و اكتب …
الله يرحم الوالد و يغفر له … و اللي سويتوه صح
يزاج الله خير على المرور و بارك الله فيج …