<center>هذي خطوبتي يا اخوان
قصه تثير كل الأشجان
ساعات اتذكر واضحك
وساعات اندم حزنان
اولها آذكر اني
تميت جم يوم حيران
كان نومي نوم متقطع
واوقات كول الليل سهران
وساعات آنط متصرع
من فوق افراشي حلمان
كنت افكر في الخطبة
وآسأل اصحابي العرسان
وكنت آقضي بعض الساعات
آتمشى ابروحي ولهان
آقعد تحت اظلال النخيل
وآخوض في ماي الشيبان
وساعات كنت آروح السوق
آشتري كولونيه وادهان
وجدام المنظرة آقعد
آفرك في ويهي الكحيان
هذي كانت عادتي
لين ما وقت الخطبه حان
يوم موعود كان كله ورود
ما آنساه لوتطول الأزمان
آذكر من غرفتي حولت
وجفت اهلي وسط الليوان
وأمي رشتني ابماي ورد
وقالت : يحميك الرحمان
وأختي راحت اتيبب
وكل واحد في البيت فرحان
رحنه بيت العروس
نتعرف على ابوها افلان
قال : اقلطوا في الميلس
وفتحوا لنا دار الضيفان
وتمينه اقعود متقابلين
ما تحرك في احلوجنه السان
وتم قلبي يضرب مسرع
جني في وسط الميدان
كان الجو وايد بارد
وكان ويهي يهطل عرقان
قلت : راح ملح كل المكياج
والمخشوش في الويه بيبان
ومرت نص ساعه ثقيله
ودش الأبو واحد متنان
باينه النعمه على كرشه
وساطره ايلق مثل الحمران
ريال بس السانه اذراع
جنه السان بعير يوعان
تم يشلخ شلخات عوده
تتبطط منها السيسان
وراح ايحش فينا ساعتين
وايبيعنا من كل دكان
ويصبغنا بأحمر واصفر
ما جنه شيبه خرفان
وعقب القهوة وعقب الشاي
واسويلفات في كان ومان
بحلق في ويهي وقال
جم عمرك من غير نقصان؟
قلت له اصغير ، خمس وعشرين
ونقصت بس من عمري ثمان
ومعاشك قال جم تاخذ؟
زدت من النوط الخضر خمس نيطان
بدل الخمسميه قلت الف
إفشار زينه لي الشيطان
انتهت الحلقه الأولى من سالفة خطوبتي
فترقبوا الحلقه الثانيه للتكمال
</center>
في الأرتقاب مع الجزء الثانى 😀
……..شو رايك تاخذ نبيل وياك …….زانا وجورجي راح نخطف العروس لك…….بدون مهر او عوار راس………..
هاااااااااااااا شو قلت انطر جوابك علشان نخطط عدل 😉
يعني نقول مبروك ؟
تراه خبر مب هين ….
والحلويات والملبسات زاهبة ترى..
انتة قول ايه بس…
اخوكم و محبكم / بوجابر
اشكر الجميع
وعلى من بارك لي او تفاجىء بي
كل اللي اقدر اقوله انتظرو الحلقة اليايه
وياما في الحبس مظاليم
نبيل مايقدر يوطوط ويطلع من البيت اصلا لأنه ماعنده مفتاح البيت وانتو تدرون منهو اللي عنده المفتاح
مشكورة الكاتبه الصغيرة
انا يتراوالي ان الصورة مقلوبه
الصورة جدا حلوه مشكوره على التواصل الدائم اللا محدود
بس توقيعج ناقصه شيء
اظنه ناقص شيء
<center><img src=http://www.send4fun.com/IMAGES/people/cupcake1.gif></center><BR><font size="1">[عدلت بواسطة fawar في 24-04-01 – 03:23 pm]</font>
لاحق على صدعة الراس والمشاكل
يحلييييييييلك يا فوااااارو ……..
بانتظار الحلقه الثانيه
نبا نشوف شو صار …لايكون راغك من البيت ولا شي بس 😉