في امارات في الدولة فيها بطالة او بمعنى اخر تقل فيها فرص العمل عن باقي الامارات الكبيرة من دبي وابوظبي مع انه نسبة البطالة بشكل عام كبيرة في الامارات وتخيلوا تقدر ب 30000 عاطل عن العمل حسب ادلاء مطر الطاير وزير العمل والشؤون الاجتماعية……وفي وقتنا الحالي الاف يتخرجون من الكليات والجامعات….. هالتعب والعلم حرام انه يروح……طبعا الشباب سهل عليهم انهم يداومون في اماراة ثانية اما البنات فصعبة شويه مع ان في هالوقت صار عادي عن قبل لانه ضرب خط كل يوم…..
هل توافقين العمل في امارة اخرى اذا لم تتوفر فرص العمل في امارتك؟؟؟ 
وماهي برايك سلبيات هذا الشي؟
وما رايكم جميعا في هذا الموضوع؟
السلام عليكم ……بالنسبة لي مب مشكلة الشغل في أمارة ثانية الحين العالم أستوى قرية صغيرة مثل ما يقولون عنه يعني عادي بالنسبة لأمارة ثانية تبعد كم كيلو والله يخلي السيارات والسكن الداخلي اللي توفره بعض الوظايف….. في بنات من أمارة رأس الخيمة ويشتغلون عندنا هني في بوظبي واللي قاعدة عند أخوها أو السكن الداخلي مال التربية أو الجيش اللي في مستشفى زايد العسكري وبعدين في وظابف تبا من الوحدة صبر كم سنة بعدين تطلب نقل للأمارة اللي هي فيها هذا رايي أنا بس في حد بيقول وين المحرم وما يجوز الأنتقال لأنهم بيعتبرونه سفر كل موضوع بالنسبة لي أشوفه من زاويتين دنيا ودين وكل واحد ورايه ومدى تقديره للموضوع
تسلمين اختي على الطرح
وبراي انه عادي البنت اداوم في امارة ثانيه
ولكن بان تكون محتشمة …. وفي مكان مافيه رياييل… يعني في مكان مختص للنساء بس
بس طبعا هناك سلبيات لعمل البنت برى الامارة اللي عايشه فيها
فمثلا طلع لها دوام في بوظبي وهي من عجمان او من الشارجه…
ما بتقدر تيلس هناك اسبوع مثل الشباب وترجع على اخر الاسبوع
ثاني شي عاداتنا وتقاليدنا ما تسمح اتخلي البنت تطلع لامارة ثانية بروحها
وخصوصا انه الاهل ما يعرفون طبيعة شغلها اذا كانو شواب
وديننا يقول انه ما نطلع ويا دريول لانه حرام
والمجتمع بعد يلعب دوره …. 
وطبعا يعتمد على البنت نفسها… كيف تقنع اهلها
اما اذا الشغل كان في اماره دبي وهيه في الشارجه او عيمان …
اظن انه عادي …
بس تبين الصدق كنت اقول عادي بس عقب ما عددت السلبيات هونت
خلينا انشوف اراء الباقين
السموحه ع القصور
شموخ النخيل: صح صار هالشي عادي بس في وايد ناس في مجتمعنا يرفضون هالشي….ولكن دام الوحدة بتكون مع اخوها فهالشي بيبعد عنها القيل والقال وبتكون في امان لان الناس في مجتمعنا ما ترحم بيقولون ما عرفوا فلان امطرش بنته الاماراة الفلانية بروحها الله اعلم شو اتسوي بروحها اما البنات اللي يدرسن في امارة ثانية فاتصور متشددين عليهم في السكن وفي اهل واثقين في بناتهم ويطرشونهم بس يخافون في نفس الوقت ان بنتهم تتعرض لمواقف اذا كانت المسافة طويلة لا سمح الله اختربت عليها سارتها في الدرب……
مشكورة على المداخلة
تسلمين على طرحج هل الموضوع ممكن الشارجه بس مثلا بوظبي صعب وايد
بنت دبي: ليش اكتفيتي بهذه الاجابة فقط…ليش ما اتناقشينا الموضوع؟؟؟
البنت لازم تجلس عندابوها ومها ولوكانو فقرا لازم تصبر عليهم ولاتقول اشتغل في المكان بعييد حرام عليها لانسان يقول الحمدلله ولايقول انا فقير انافقير ويشتغل الشغل الحرام البنت لو ليس ابوها اواخوها معها حرام تشتغل لازم تجلس بيت ابوها ممكن تتزوج رجل عنده فلوس الله سير**ها لو لم تغضب الله واهلنا لايوافقون البنت تشتغل مع الرجل يقولون حرام ونحن نطيعهم برالوالدين لازم
هلا اختيه جارة القمر 
بصراحة أهنيج على الموضوع الحلو 
بالنسبة لي واااااااااااااااااااايد صعبة أداوم في إمارة ثانية … يمكن تقولون انتي عندج سيارة و تسوقين … اقولج هيه و الحمد لله …
بس البنت تظل بنت و محتاية حد يكون وياها ( يعني ابوها او اخوها او عمها او خالها او ريلها لو معرسة ) و البنت تبقى انسانة ضعيفة يمكن يستوي لها أي شي برع امارتها …
و لو بنجر التاير او وقفت عليها السيارة فنص الخط و وقفت تتريا حد يساعدها … او حد اعتدى عليها و هي في الشارع فمكان مقطوع عن الدنيا … شو بيستوي لها … شي وايد صعب …
الله يعين
يزاج الله خير و بارك الله فيج على طرح الموضوع
أنا بالنسبة لي مستحيلللللللللللللللللللللل …
شو كالفنها تسير امارة ثانيه … حتى لو حصلت شغل وكانت محتاجة لهالشغل في امارة ثانيه تخليه ولا تسير له والله بيعوضها أحسن عنه لأن من ترك شيئاً لله عوضه الله خيراً منه ..
وبعدين سبحان الله البنيه تمرض او يستوي فيها شي منو بيوديها المستشفى … ترى البنيه مهما وصلت لأعلى المراكز الاجتماعية في الوظيفة تتم بنيه وتم ضعيفة ….
وأنا معاي في الدوام بنات من امارة ثانيه حليلهم يتمنون انهم يكونون في امارتهم لأنهم وااااااااااايد يتلعوزون في كل شي …
ومشكوووووره حبيبتي جارة القمر ع الموضوع اللي يمس واقعنا …
من ناحيتي انا ما اعتقد ان اقدر اسير اي امارة غير امارتي واهلي ما بيرظون ليش اطول المسافه خاصه اني بنت صعب علي في امارتي بوصل بسرعة اما امارة الثانية لا
وعود: بس تخيلي الاماراة اللي انتي فيها صعب وايد اتحصلين فيها شغل وانتي انسانة طموحة تعبتي ودرستي اربع او خمس سنوات عادي عندج تعبج هذا كله يروح ببلاش؟؟؟ وتيلسين في البيت لا شغلة و لا مشغلة… صح من ترك شيئا لله عوضه الله خيرا منه بس هالشي ما يخصه في هالموضوع بس الله امرنا ايضا بالتوكل عليه وليس التواكل لانه الشغل ما بيينا لين بيتنا نحن لازم نتعب واندور عليه
بنت دبي: عزيزتي في دبي اعتقد مافي مشكلة اتحصلين فيها شغل السالفة سهلة لانه شي وايد اماكن حكومية وخاصة ومحلية وشبه خاصة وفرص العمل متوفرة لانه كل يوم يفتحون شركة يديدة او مشروع يديد وهالشي يتطلب عمالة…بالع** المواطنين من باقي الامارات يداومون في دبي
ميلودي: فعلا عزيزتي هاي من اهم السلبيات للعمل في امارة ثانية ولكن تتصورين لهالدرجة بلادنا ما فيها امان؟؟ يعني تقدر البنت تتصل في احد من اهلها او اخوانها ويساعدونها…..
شموخ النخيل: طبعا عائلة عن عائلة تفرق وانتي اهلج علموج تعتمدين على نفسج وحملوج مسؤولية وواثقين فيج وهذا شي طيب بس في ناس وايد يخافون على بناتهم مثل اهلي اوووف
