ثق في المرأة ولا تثق في عصفور 2024.

السلام عليكم ورحمة الله ..

هالقصة حقيقي بس مع شوية ملح وبهارات ..

عندي الجو في الغرفة ولا اروع بس يحتاج ل****ة العصافير .. توكلت على الله وجبت لي عصفورين ..
اليوم الاول ماحصلي معهم سلوى ولا كأنهم موجودين .. قلت ياولد مابعد خذوا على المكان .. ومستحين منك

اليوم الثاني .. كان هالوجه نطق فترى واحد منهم نطق

اليوم الثالث .. قلت ياولد انت راعي سهر وهم في الليل ينامون .. وش الفائده منهم .. فكرت وياشيني لافكرت .. فكرت إلا اقلب نظامهم مثل نظامي واخليهم ينامون الصباح ويسهرون الليل ..
حطيت القفص عند مستوى رجولي وانا جالس قدام الكمبيوتر .. وكل ماشفتهم غفو شوي رجفتهم برجلي لين صحو ..وعلى هالحال اكتب كلمتين واشيك عليهم وهاتك يارجف .. صحصحو شوي حتى بالامارة واحد منهم نزل يشرب وكني به يقول نشفت ريقي لابارك الله في اللي باعني لك .. ايه والله لابارك فيه اللي باعنياك وانت اطرم .. نسيتهم شوي ورجعت اناظر وإلا هذولي هم نايمين ولا انا على بالهم .. مير واحمق عليهم وارجفهم ذيك الرجفه اللي طلعت اكلهم وكبت مويتهم .. ومير اللي يخزني واحد منهم ذيك الخزه تقول قاتل ابوه .. صح استحيت على وجهي شوي بس رجعت لي الثواره وارجفة رجفة ثانيه لين عرف من يخز ثاني مره ..

سمحت نفسي منهم وقررت اعتقهم لوجه الله .. انتظرت الصباح علشان يلاقون لهم ربع يطيرون معهم .. والنور طلع ولا ماطلع .. سميت بسم الله وجبت الققص عند دريشتي ..

اللهم اني عاتقهم لوجهك الكريم فجازني بهم احسانا ولا تعذبني بما فعلت بهم ..

.. الاول انا فتحت باب القفص ولا مافتحته تقول فشقة وانطلقت وصوصوصوص ويعنبو شيطانه تو ماصوصو بيني وبينكم قهرني
الثاني ادوره يالربع والله مالقيته ولا شفته طار ولا مرواس ولا هو في القفص ..

بسم الله الرحمن الرحيم لايكون مسكون الله يقاصرنا وياهم بالاحسان …

اناظر بداخل غرفتي مافيها شيء .. انفض الستاره مافيها شيء .. يعنبو ذا وين راح مادري وش اللي جاء على بالي اطل تحت في الحوش .. واناظر ابرق .. إلا اخونا سافط على وجهه من ارتفاع 5 امتار .. ياغبيّان ماطرت انا اشهد انك مانتاب وجه عتق
اتاري جنحانه مقصوصه قصوه في الصفاة وانا ماجبت خبره .. وعثيت في الرجال وتسببت عليه بس يستاهل هالاطرم .
براحتك عمرك ماطرت .. وبصراحة عقب سهر ليل مافيني حيل انزل اشوف وش سالفته سكرت دريشتي وتلحفت ونمت .. قلت تلاقيه يدلع شوي وبيطير ..

قمت وروقت ونازل مع الدرج اصوفر .. فرحان بعمري متسبح ..

انا تنصفت الدرج ولا ماتنصفته .. ياللي فيك مافيك يالظالم ماتخاف الله .. مافي قلبك رحمة ماتحس ياعديم الاحساس .. يالله مساء خير .. من هاللي مافيه رحمة ومستلمته امي ..
طبعاً امي قاعده في آخر الصالة ولايمديني اشوفها إلا لما انزل لين آخر الدرج ..
وانا اللي يوم صار وجهي في وجه امي .. إلا اميمتي ماعندها احد .. ولا في يدها سماعة تلفون .. والتلفزيون طافي .. يعني هالدعاوي مهيب على اسرائيلي في التلفزيون
بس السالفة فيها ان واخواتها ..
وشفيك ياميمتي عسى ماشر اشوفك تحاكين رويحتك ..
انا احاتسيك انت يامال الصقه ..
ترن ترن تراااام .. افا ياذا العلم وش فيك علي ترى اليوم خميس مافيه صلاة جمعة فاتتني .. وش السالفه ..

مسوي نفسك ماتدري يوم انك مافيك رحمة على هالعصيفيرات وراك تشتريهم مسيكين لاقينه تحت دينمو المويه متوزي من الشمس .. مخليه في الحوش لا اكل ولا مويه .. اها لو جاية قطوة وماكلته ..

وانا اتمتم بيني وبين نفسي لاحرام تاكله قطوة ولا افرح بشوفة هالمنظر اللي يشفي غليلي في هالاطرم

ياميمتي السالفة كيت وكيت وانا وش دراني انه غبي مايطير ..
هو الغبي ولا انت الغبي ويوم شفته ماطار وراك مادخلتاه تاركه في هالشمس
((بس امي الوحيدة اللي تقول لي غبي .. ودائماً ماتوشحني بهذا الوسام))
وبيني وبينكم صادقة .. شمس الرياض تحمر الرجال ماتحمر عصفور اطرم ..

خلاص ولا يهمك وهذا راسك ابوسه ولا تزعلين علي ..
اها بس وخر عني .. مانيب امك ولا تحاكيني لين تشوف لهالعصيفير صرفة ..

ابشري الحين اجيبه وابوس راسه قدامك ومالك إلا اللي يرضيك ..

واروح لسبب المشاكل عصفوري الغبي .. وا**طه من رقبته واحطه في قفصة .. قلت اسبوع لا اكل ولا شرب اوريك انا ولا انت ..

ولأن كل غبي حنيّن حنيت عليه وعطيته مويه واكل بعدين .. قلت اعتني به لين ينبت له جنحان زي الناس وبعدها اطيره .. ويوم وراء ويوم حبيبي ماجاني نوم (تحياتي سميره سعيد) ويوم ورا ء يوم بدأ ي**** ويصوصو والعصفور غدا رجال سنافي واسفهل .. وصدز قالوها مابه محبة إلا بعد عداوة .. صار هالعصفور مقرب لي ومن كثر حبي له وحبه لي .. وحق الصداقة بينا قلت اكافأه برحلة ينفه عن نفسه شوي .. قلت اطيره واخلي قفصة على الطاقة ولابد مايرجع لي لا غابت الشمس .. وغابت الشمس واشرقت وغابت شهور واشرقت وكاني شايفكم فانا شفته من بعدها .. خيانة

ومن هالموقف نصيحة .. ثق في المرأة ولا تثق في عصفور ….