وبعدين ليش اطالعوني جيه؟ الدراسة اليوم ويانا…مستانسين يعني ما عندكم مدرسة؟ تراها كلها اسبوع اثنين ثلاثة وبعدين مع الخيل يا شقرا…
انا بعطيكم نصايح على الطاير من واقع الترسبات الايديولوجية التي واجهتني في الفترات السابقة من الاعوام الدراسية(بروحها سنتين) واعطيكم عصارة جهدي(حلوة عصارة هذي) وفلذة فكري(هذي يديدة ما عليها لطش) ولقيمات ابتكاراتي(وكالة)….
انزين نبدا ويا اول فكرة…
1ـ السنطور: ذاك الجهاز العجيب الذي يرن فتزجره ومرة اخرى يرن فتنهره وثالثة يرن فت**ره…ولو قمت باحصائية حول الاسباب التي تؤدي الى عجز حاد في الميزانية الشهرية للشقة مالتنا انا وجسوم لكان السنطور هو السبب الرئيسي…على الاقل خمسة في الشهر بس ما علينا صرنا خبراء بكل انواع السناطير من ابو بس الى الديجيتال اللي يعطيك اصوات هادية مثل ****ة عصافير او امواج..الله يرحم سناطير زمان…
شكلنا روحنا بعيييييد عن الفكرة مالتنا…
السنطور سلاحك وقت الشدة خاصة ايام الامتحانات فحاول قدر الامكان ان تمتلكه :D:D
الشي الثاني…
الاساتذة مال الجامعة…..
خلوكم وياه قبل الحصة ..عقبها ..مكتبه..برع..عطوه فيمتو وسندوتش شاورما شراتنا مب من قبل الرشوة لاااا بس من قبل الصداقة وتوطيدها(الدنيا حر)ولا تنسوا انكم دوم تبتسمون وياه وتسالونه ولو كنتوا فاهمين واممم ..
باقي شوية وتبدا اول كلاسات الخريف فلذلك نقول لكم شدوا حيلكم وشكرا لحسن استماعكم ..نكمل بعدين .يمكن
عنــــــــــــــــــــ#G# ـــــــــــــــودي
😡
أووووووووووووف…يالدراسة…
والله ضحكتني يا خوي بوجابر
حشا مب نصايح هاي
وحليلكم والله يا الفريخات بتبدا الدراسة وبيبدا عوار الراس الحين
الله يعين الأمهات عليكم 🙁
بس عاد
كله صوب والسنطور صوب
ذكرتني بوحدة من بنات الجامعة الله يذكرها بالخير
كانت تعاني وايد بسبب رقادها الثجيل وتحاول بشتى الطرق إنها ما تفوت محاضرات الساعة 8و9
وأزمتها دوم إنها تنش تبند السنطور بدون ما تحس وترد ترقد
فاتفقت مع بنت حجرتها
إنها تخش السنطور في مكان
بعيد عنها عشان تعيز وما تحصله فيتم يرن لين ما تنش حق الدوام
وفعلا ما قصرت الثانية وخشته في موقع استراتيجي
وتم السنطور يرن ويرن لدرجة أن خلى هاي الفقيرة تنش متخبلة تدور السنطور ومب قادرة تميز الصوت من وين طالع
أخيرا بعد ما تجهزت وكانت لابسة وبتظهر تداوم أكتشفت وهي تبا تبند الباب ان الصوت لاصق في الباب فاكتشفت ان السنطور خاشتنه اختها في مخبا كندورتها المعلقه ورا الباب
فأنصحك أخوي بوجابر تجرب هاي التجربة
بدل ما تخسر عمرك وتشتري كل شهر على قولتك سنطور يديد
جربها وان شاء الله بتدعي حق إختك أم همام
كم تام لنا من الاجازه.. اشوا اسبوعين..بس صدق مأساة السناطير ما تخلص…
بعد لو سمحت أريد نصايح تشجيعيه للمشاركه بالمحاضرات..ليش ما نطيع نجاوب يوم
نعرف الاجابه..يالله ..عطنا النصايح الماسيه وانشالله ننتفع بها..
الصراحة نصائح ما تتعوض ….. الله يعطينا مما عندكم