أدري . . والله أدري أصلاً لو يخلون غريب حارب وسط هجوم يكون أحسن . . لا لا شو فهد . . هذا هجوم موب وسط !!! منو ؟؟ زورو الله ينطبه ويا شعيراته تقول شبكة إنترنت . . لحظة خميد أقصد حميد خلك على الخط (واحد زخته أمه وهو يالس يتكلم بالتلفون وأونه يدرس عشان الثانوية العامة) لا لا لا والله كنا نراجع الأسئلة والمقرر ونحل التقاويم ونركز على الخلاصات ونحفظ القصايد ونسمِّع الأحاديث . . !!!! إيه إيه عبود يوز عن الرمسة هاي مالتك . . باكر امتحانك (كيمياء)!!!!! تقص على أمك ؟؟؟؟ صدق أنا غشيمة وما درست بس موب تقولي يوم الكيمياء تسمِّع أحاديث ؟؟؟؟ قصايد ونثر ما عليه معقول في الكيمياء الأيونية !!!!!
زين زين يمّه . . . خلاص بدرس بدرس حشرتونا والله . . . الله ياخذ الكيمياء وسنينها والدراسة و أذيّتها . . شو هذا الواحد ما يرتاح يعني ؟؟؟؟؟ (يا ليل يا عين . . أل بي سي) . . . خلاص سيري سويلي صنكافيه أقصد نسكافي بالحليب عشان أركز في الدراسة ومابي أشوف رقعة ويه حد من عيالج الحينه . . . الله يهديك ياولدي ويوفقك إنشالله . . . خلنا في اللي كنا نقوله . . وين وصلنا ألو حمييييييد . . ها ها لا تقول أمك زختك بعد ؟؟؟؟ زين واليوم شو الترتيب ؟؟؟؟؟؟؟ كيف ؟؟؟؟؟؟ السينما ماشي فيها أفلام غير سنان في الغابة الخضراء . . . وعرض ثاني حق الفيلم الكيني . . شرارة الحرية السوداء (الحائز على 7 جوائز في مهرجان القاهرة للفول والطعمية في جرش) !!!! . . (هاي عدال هوليود اللي جدام دوار المربعة عند سوق المواشي) . . . لا لا لا شوف أنا السينما ما أروم . . ماعندي بيزات اليوم (أستاذ شحيفان القطو . . خريج جامعة قحطة) !!!! شوف أقولك يا أخي نسير نحاوم في السوق وربك نصيد مزايين . . ياويلي عليك . . خلاص مر علي بالرينج الأحمر مالكم . . أوكيه أنا بعفد من الدريشة الشرقية مالت الغرفة (كابتن ماجد) . . وإلا أقولك بسير بخبر الوالدة بنسير ندرس عند واحد حنبصاني . . موس في الدراسة تقول شنطة حلاق !!؟
وتمضي الكذبة البيضاء في طريقها ضاربة بجميع أنواع الدراسة عرض الحائط !!!!!! وأبغي الكل يفهم وياي محاسن الدراسة ومساوئها وبدون زعل يا عبود !!!!!!!!؟
المشكلة فينا نحن يالشباب وأنا واحد منكم . . ماعندنا الاهتمام الكافي للدراسة . . ومانحس بالحافز الكبير لها (شو رايكم في المحاضرة مالتي ؟؟؟ أنفع سكرتير صح) ؟؟؟؟!!!! وبعدين نعود لنقطة أهم من جذيه . . . ليش هاي الحشرة والضجة الإعلامية على امتحانات الثانوية العامة ؟؟؟؟ الطالب يتعرض لضغط نفسي والأهل والجيران والأصدقاء والمشكلة كلها بسبّة التعبئة النفسية اللي يتعرض لها الطالب (جنرال المدفعية في حرب البسوس) . . . ومدرسين خصوصين يشلون بيزات بالهبل (لا لا أنا موب من نفس الجامعة مالت عبود) . . . والمدرسين اللي في المدرسة الله لا يراويكم ؟؟؟؟ . . يوصل الصبح المدرسة وهو متضارب ويا حرمته وما حطتله الكيس في الريوق . . أقصد الريوق في الكيس واختار اللي يناسب بطنك يا أستاذ .. ومن يشوف الطالب على طول يقوله .. الامتحانات صعبة والعلامة الكاملة مستحيلة ولازم تدرس وتطلع عيون ميّتين أهلك .. .!!!! ونحوّل على الجامعة !!!! ( الظاهر يابوالشباب هذا آخر شي تكتبه في حياتك وبعده على طول لك جناح فخم ورا الشمس) !!!! المهم بالنسبة لنظام التعليم الأساسي . . . (سامح الله من وضع حجر أساس التعليم الأساسـي) الطالب يتلعوز ويتبهذل وبدون هاذيك الفايدة . . يعني الطالب في التعليم الأساسي يدرس عربي ؟؟؟؟؟ شو هنود نحن؟ وليش الحاجة للتعليم الأساسي . . يعني الدراسة 12 سنة على الفاضي ؟؟؟؟ أكيد عشان يا الطالب كان يلعب أيام الدراسة . . أو بسبب ضعف المناهج . . (رحت فيها . . خلوني أكتب من تحت السرير، أحسنلي) . . . ويوصل الطالب يشوف نظام الكلية غير عن التعليم الأساسي وينسى كل اللي أخذه !!!!!! صدقوني أدري إنه في طلاب يغلطون في الإملاء !!!!!!! بس هذا يعني إنه في خلل من المدرسة . . وموب الجامعة اللي تدفع الثمن . . الجامعة مرحلة تصقل مواهب الطالب . . تنمي عنده الرغبة العلمية . . . (يا عيني عليك . . أسميك تنفع عشان الحملات الانتخابية) المهم نرد حق خويّنا عبود . . . ونشوف شو صار وياه ؟؟؟؟؟؟؟؟؟
بو الشباب طبعاً بعد ما شبع سب وتكفّيخ بالنعول والكعوب (الله يخلي الكي كورنر وشومارت) ورد البيت منتهي . . . تشوفه أمه وتقوله شو اللي صار في ويهك ؟؟؟؟؟ شو خلوه تجربة استخلاص غاز الميثان من الجلد بعد إضافة اليود ؟؟؟؟؟ (موب داخلة في الامتحان . . لا تلخبطينا بعد) . . . بعدين حسام ربيعك اتصل وقال شو الخريطة المطلوبة باكر في امتحان الجغرافيا ؟؟؟؟؟ أهلاً . . جغرافيا . . . !!! من قال ؟؟؟؟؟!!!!! والسموحة . . .
منقوول
تحياتي لكم دمعة فرح
الله يحرمنا من الجغرافياا و العلوم و الرياضيات و الإنجليزي … و النحووو
العربي أوكيه بس مب النحووو و التاريخ عجــــــــــــــــــــــيب كله حفظ احلى شي فيه ..
يسلمووو دمعة فرح …:D:D:D:D:D:D:D:D
بردلج التصفيق أنا ..
تصفيق حار من بنت دار الحي لدمعة فرح 
بس عاد إيدي إحمرت 
نياهاهاها السموحه
هدووووووووووووء ( بسكم تصفيق )
مشكووووره اختي
احمدي ربج التاريخ عندج سهل
اما انا الله يعيني على التاريخ وحفظه
هالسنه بالدز ناجحه في التاريخ
الله يعيني السنه اليايه
والسموحه
عقب اسبوعين مدرسه .. 😡