العام الجديد الى اين بطاقة

ما شاء الله عليك يا الرهف .. بصراحه شغل جميل ورائع .. بس آخ لو كنتي كبرتي حجم اللوحه شويه!! كنا بنستمتع أكثر .. بس ما عليه أنا أعرف أن هاذي عيّنه.

الشي الرائع في اللوحة هوه -حسب ما أرى- الحركة في النصوص عن طريق التوجيه العشوائي .. وهذا طبعاً تكنيك طيب يستخدمه المحترفون لشد الانتباه واعطاء الاحساس بالحياة في اللوحة ، وأنه فيه كميه كبيره من الاشياء حاصله (بس يا ريت لو كنتي نوعتي شويه في أحجامها وأنواع الخطوط بعد .. كانت بتعطي الاحساس بالبعد والقرب وهوه أيضاً نوع من الحركة) ..

الشيء الثاني الملفت أنك ميزتي لون رقم السنه عن لون باقي النصوص ولون الخلفيه .. وهذا طبعاً شي رائع .. لأن رقم السنه هو الشيء الأساسي في اللوحة وعشان هذا لازم يتميز وإلا كان بيضيع في اللوحة ..

الشيء الثالث استخدامك اللون الأزرق لرقم السنة (وكنت أفضل لو كان أزرق أفتح شويه) كان جداً موفق .. لأنه مناسب مع بداية السنة .. لأن البداية دائماً تكون مثل الصباح بلونه الأزرق المنعش ..

طبعاً اللوحة فيها أشياء جميلة ثانيه .. بس ما حبيت أطول ..

في النهاية أقول أن اللوحة هاذي مدرسه ممكن نتعلم منها الكثير .. وشكراً جزيلاً يا "مدرستنا" الرهف على هذي الفرصة .. وان شاء الله نشوف لكم أعمال أخرى رائعه .. نتعلم منها مجاناً!!.. على فكره .. ليش ما تزورينا في إمارة الجرافي** .. ترى الجماعه هناك ماخذين على خاطرهم عشان بعض المبدعين ما يزورونها.

وتقبلي في الختام خالص تحياتي وتقديري ، واسمحي لي على التطفل بالنقد .. بس شو أسوي .. ما أقدر أشوف شي رائع وما أنقده .. عقده بعيد عنك!!