اخواني و خواتي …
يمكن الموقف اللي أذكره لكم ما يكون واايد مهم بس بعد له انعكاسات علينا احنا كبشر و كمسلمين …
مرة كنت طالعة بسير الشغل، سلمت على الأهل و طلعت و أنا أسمعهم يدعون لي و خصوصاً الوالدة ( الله يحفظها) ، ركبت السيارة و بديت أقرأ الأذكار و الأدعية طلعت من البيت، و دشيت الشارع عسب اسير الشغل و ما انتبهت أني كنت بلف على واحد الله يستر عليه لأن أعمال الطرق لحد الحين عندنا في الشارجة،
و ساعات ما نروم نشوف الشارع من الزاوية اللي نطلع منها بسبه البلاوي اللي حاطينها على يمين و يسار الشارع، المهم انتبهت ان اللي كنت بلف عليه تحركت سيارته بس كأنه ما يروم يسوقها شراة ما هو يبغي ( و قامت السيارة تتحرك بسرررعة و السايق ما يروم عليها) و شفته داس على شي أسود طايح في الشارع و دااارت السيارة دورة لليمين و بعدها دارت و لفت لليسار ، و تجربت من سياتي و قمت أدعي ربي ( الله يستر ) و اقوووول الحين بتندعم سيارتي للمرة الثالثة 
، المهم دارت السيارة دورة كاااملة في الشارع و عقب عفدت على الرصيف و دعمت عمود الكهربا … 
و كل هذا استوى في لحظات بسيطة و صورة السيارة و هي تدعم العمود و صوت الحديد و هو يت**ر لحد الحين احيده …
وايد أسئلة فمخي و الحمد لله ( الله ستر ) كانت سيارتي أجرب سيارة له، و كل هذا شفته من المنظرة اللي جدام ( اللي في النص ) و الأبعاد اللي عندي في المناظر غير حقيقية … الحمد لله مر الحادث بدون اصابات … 
يلست أفكر كيف كان يوم صاحبنا اللي سوى حادث ؟؟؟
لما طلع من البيت كيف كان ؟؟؟
الحادث اللي استوى له، هل كان بسبه حد دعا عليه ؟؟؟
اللي سوى الحادث تعوّر ولا لأ ؟؟؟ شو بلاه؟؟؟
الله يحفظكم بحفظه و اتحملوا على اعماركم و انتوا تسوقون، واقروا الأدعية و الأذكار قبل ما تطلعون من البيت، و لا تزعـّلون أهلكم و خصوصاً الوالد و الوالدة ( الله يحفظهم لكم و يحفظكم لهم ) …
بقلم اختكم …
ورد الجـــوري …
والحمد لله ما صار شي
والله الله في الاذكار
بارك الله فيج الغاليه ع الطرح
اسئلي ولا يردج الا كيبوردج
ودمتي سالمه
[/grade]
وفعلا الاذكار مهمه
ومنها دعاء الخروج من المنزل
بسم الله توكلت على الله ولا حول ولا قوة الا بالله . اللهم اني اعوذ بك ان أضٍل او اضل او ازل او ازل ، او ظلم او اظلم او اجهل او يُجهل علي
واكيد رضا الوالدين
والله يحفظ جميع المسلمين
أهم شيء أختي سلامتكم …… والحمدلله على السلامة ….
واذا ودكم نسوى أحتجاج تقدمه الى البلدية باسم … أعضاء ومشرفي منتدى الإمارات … هم حاضرين
واذا تبون نجتمع كلنا الأعضاء ونقوم بحملة دفن وترصيف وسفلت الشارع ….. هم حاضرين …
أهم شيء عندنا سلامة الناس اللي يمرون من هذا الشارع ….
تحياتي
مرة كنت سايرة الدوام والشارع سيدين طلعت جدامي سيارة جمس وتم يلف في الشارع وما قدر يسيطر ع السيارة ركب الرصيف ونزل ودعم سيارتي لاني انا اللي كنت في ويهه والحمدلله الضربة يت ف السيارة وما تعورت …….ومثل ما قلتي الاذكار والدعاء لازم الواحد يذكرها دايما وما يغفل عنها خاصة دعاء الخروج من المنزل ويطلب رضا والديه خاصة لو كان بيسير مسافات بعيدة
الحمدلله على السلامة ….
حفظكم الله اينما كنتم …..
*
بعد دعاء الخروج هناك دعاء ركوب الدابة وهو
(( سبحان الذى سخر لنا هذا وما كنا له مقرنين ))
الله يسلمج اختي
و الحمد لله على كل حال … الله يجعلنا من الذاكرين الله كثيراً و الذاكرات
تسلمين اختي و يزاج الله خير على تواصلج و بارك الرحمن فيج
هلا اختي اللوتس
تسلمين اختي و أحلى شي في الدنيا حب الله و ذكر الله و طاعة الله و طاعة الوالدين و رضاهم … طبعاً بعد رضا الله …
تسلمين اختي … الله يحفظ الجميع
يزاج الله خير و بارك الله فيج …
ههههههه ضحكتني … ما شاء الله عليك مستعد تساعد …
زين خلاص قبلنا المساعدة و يزااااااك الله خير … خلاص شلوا البلاوي من على الشارع بس الزرع شوي طويل …. منو بيقصه ؟؟؟
ما شي غير نخبّر البلدية :g_ouf:
يزاك الله خير و بارك الله فيك …
اختي مريوم
الله يسلمج الغالية
يزاج الله خير اختي
اهم شي ماتعورتي
هذا من دعا الوالدين ,,, ترى الدعاء يخفف القدر
وتستاهلين السلامة
الواحد المفروض يحافظ على الأذكار دوووووووووم
تسلمين أختي انج شاركتينا بهالموضوع,,,,,,
[/frame]
الحمد لله علىالسلامة و ما تشوفين شر
و الحمد لله الضربة يت في السيارة و مب فيج
صدق الغالية مفروض نتوقع كل شي … و وايد حوادث تستوي بسرعة و من أخطاء غيرنا و عسب جذيه مب الذكي اللي يعرف يسوق الذكي اللي يعرف كيف يتجب أخطاء غيره في الشارع …
يزاج الله خير و بارك الله فيج و الله يحفظج اختي
اخويه ابا الوليد …
الله يسلمك اخويه
و الله يحفظ الجميع وين ما يكونون …
يزاك الله خير و بارك الله فيك …