ها اللي شفته ف العرس .انتوا شو شفتوا؟؟؟ 2024.

فصل الصيف وموسم الاعراس الحين واكيد معظمكم حضرعرس ولا عرسين ف هالفترة
ويحاول اهل العرس انه يكون العرس كامل ومب ناقصنه شي ويطلع بياض ويه جدام الناس
المعرس يدخل القاعة ويستقبل المعازم ويسلم عليهم ويتعشون …الطماشة تستوي ف قاعة الحريم لان العروس تبغي تكون مميزة ف هالليلة ف كل شي ومنها الزفة اللي البعض قام يتفنن ويبتكر اشياء منها الغريبة ومنها تضحك ومنها الحلوة… بحط لكم بعض الاشياء ((واكيد البعض ف المنتدى بيقطعون البنات من التعليقات لان مب الكل عارف بالحركات اللي تستوي ف قاعة العرس مال الحريم))

تدخل العروس القاعة ومن غير باقة ورد ((وف عرف الاعراس مايصير عروس من غير باقة)) ويوم توصل عند الكوشة تستقبلها بنية صغيرة 8 ولا 9 سنين ولابسة فستان العرس والطرحة وميودة باقة الورد وتسلمها للعروس بعد ما تسير العروس تسلم عليها وتحبها

تدخل العروس القاعة وتزفها قبيلة كاملة من البنات يدخلن قبلها ويصطفن ع الطرفين وتدخل هي وتمشي بينهن لين توصل للكوشة والبنات وهي طبعا توزع ابتساماتها ع الحريم والبنات اونهن يصفقن لها لين توصل للكوشة

فيه بنات يوم تدخل القاعة تسوي عمرها رقيقة وكلاسيكية وما حد يزفها مول تدخل بروحها وهي ميودة الباقة وتوزع ابتساماتها على الحريم لين توصل

عروس متاثرة وايد بالقصص والرسوم المتحركة يوم دخلت القاعة سوت عمرها سندريلا كانت راكبة عربة ويجرها حصان حقيقي ف قاعة العرس

دخلت العروس ودخلوا قبلها الوصيفات اللي لابسات مثل الجواري وشالات الجرة على جتوفهن والموسيقى كانت غريبة عجيبة اول مرة اسمعها

العروس هاي مبين عليها انها ((عقلية تجارية )) قبل ما تدخل كان فيه عرض ازياء للجلابيات والعارضات يايات من برع البلاد والمصصم بحريني

دخلت العروس على موسيقى هادية وفيها صوت بحر والوصيفات لابسات ملابس على شكل حورية البحر

بندوا الليتات ف القاعة وشغلوا الليزر ودخلن بنتين لابسات ملابس راقصات البالية وقدمن فقرة بالية وبعدين دخلت العروس

الفرقة كانت تدق والقاعة مشتلة بالرقص قالوا العروس بتدخل وطلبوا من الفرقة تسكت لان العروس مختارة لعمرها زفة معينة ..دخلت العروس على شلة خوات المعرس كانوا شوي ويصفعون العروس لانه فيه معاويم تمو يضحكون

قبل ما تدخل العروس القاعة يحطون على شاشة العرض صور مختلفة للعروس من يوم هي صغيرة وصورها فالمدرسة والجامعة وصور الملجة …فيها عروس حطت صورها وهي سايرة السوق تتشرى اغراضها وصورها وهي ف الخياط …ووحدة ثانية حطت صورة المعرس يوم اشترى سيارة يديدة

دخلت العروس القاعة والبنات والحريم ساروا يسلمون عليها وكل وحدة سلمت لازم تسير تكتب للعروس تهنئة وتوقع ف دفتر كبير حاطينه على ستاند كبير ومزينينه وبعدين سارت العروس ووقعت بروحها ف الدفتر ((تخاف يسجلونها غياب ))

لكن يكفي السوالف اللي اسمعها من اللي يروحون الاعراس

والظاهر ان الحركات اللي يسوونها في الدخلة صارت شي انترناشونال

سمعت عن بعض الحركات اللي كتبتيها .. بس في حركة قالوا لي عنها " ماصارت ولا استوت )

كيف خطرت على بالهم .. ما ادري

صايرة في عرس بالكويت

سكتت الفرقة على اساس ان العروس تدخل على الزفة

جان تدخل مجموعة من الحريم شايلين تابوت

وصياح وصراخ ونحيب وعويل .. " كل اللي يخطر على بالج "

ووحده تقول ياحبيبتي يافلانة .. ماتهنت

ورحلت في ليلة فرحها

والحريم وراها صيااااااااااااااااااااااح ونياااااااااااااااااااااااااح

الناس فاجين عيونهم وحلوجهم وخشومهم واذانيهم " بعد كل اللي يخطر على بالج"

وصلوا عند الكوشة ونزلوا التابوت

جان يدخل المعرس يركض

راح وفتح التابوت

وباس العروس " قبلة الحياة "

وتقوم العروس بعد مادبت الحياة فيها

وتوقف ويا المعرس

وتبتدي الزفة

واللي يصيحون قاموا يصفقون

والله ها يسمونه قلة عقل مب تفنن ولا تجديد عيل حد يتمنى لعمره هالشي …لو قلنا البنية مستخفة شوي …يطلع الريال مثلها بعد
ووين امه وامها ما سارو ويصفعونهم ولا هم بعد مشاركين ف المناحة
صدق يوم قالو قلة العقل مصيبة

الله يديمها نعمة

مب كل الاعراس تكون حلوة لكن يوم يكون عرس حد من الاهل لازم تسيرين وتجاملينهم

بسم الله عليج شو ياينج ؟؟
بتسوين تبادل الادوار ولا شو السالفة ..لو سويتيها صدق بتتصفعين انتي واخوج من الخاطر ما اظن ابوج بيرحمكم

مرة ثانية لا تيليسين عند العيايز سيري ويلسي ويا البنات اللي فعمرج

هلا وغلا بزميلة المهنة

شو السالفة شو ناوية تسوين

يقول المثل طول عمر واشبع طماشة

الله يعافيج

ولكن مهما كانت الزفة اختي الغالية

هذا لا يحدد كيف ستكون الحياة…. وكل هذه الامور تبقى كماليات

شاكرة لك هذا الطرح اختي الغاليه

وزميلة المهنة

الحين الكماليات استوت من ضروريات العرس والكل يتنافس عليها والكل صتر يتفنن ويبتكر

العفو وحياج الله ف موضوعي

يعني نقول لج مبروك طلع اسمج وتعينتي